لاہور کی انسداد دہشت گردی کی عدالت نے گلو بٹ کو 11 سال سے زائد قید کی سزا سنا دی

انسداد دہشت گردی عدالت نے املاک کونقصان پہنجانے کاجرم ثابت ہونے پر مجرم کوایک لاکھ 11 ہزارروپے جرمانے کی سزا بھی سنائی

ویب ڈیسک جمعرات 30 اکتوبر 2014

عدالتی فیصلے کو قبول کرتے ہیں تاہم فیصلے کو ہائیکورٹ میں چیلنج کیا جائے گا، وکیل گلو بٹ فوٹو: فائل

لاہور: انسداد دہشت گردی کی خصوصی عدالت نے سانحہ ماڈل ٹاؤن کے روز گاڑیاں توڑنے والے کردار گلو بٹ کو جرم ثابت ہونے پر11 سال 3 ماہ قید کی سزا سنا دی۔

لاہور کی انسداد دہشت گردی کی خصوصی عدالت نے طویل سماعت کے بعد 17 جون کو ماڈل ٹاؤن میں شہریوں کی گاڑیاں توڑنے والے گلو بٹ کو جرم ثابت ہونے پر 11 سال 3 ماہ قید اورایک لاکھ گیارہ ہزارروپے جرمانے کی سزا سنادی۔ عدالت نے فیصلے کے بعد مجرم کو گرفتار کرکے جیل بھیجنے کے احکامات بھی جاری کئے جس کے بعد کمرہ عدالت میں موجود گلو بٹ کو گرفتارکرلیا گیا۔

مجرم گلو بٹ کے وکیل نے عدالتی فیصلے کے بعد میڈیا سے بات چیت کرتے ہوئے کہا کہ عدالتی فیصلے میں صرف گلو بٹ کو ہی ہدف بنایا گیا تاہم عدالتی فیصلہ قبول کرتے ہیں لیکن فیصلے کے خلاف رواں ہفتے ہی کیس تیارکرکے ہائیکورٹ سے رجوع کیا جائے گا۔

واضح رہے کہ 17 جون کو ماڈل ٹاؤن میں گلو بٹ شہریوں کی گاڑیاں توڑتا رہا جس کی ویڈیو منظر عام پر آنے کے بعد اسے گرفتار کرلیا گیا تھا۔