18 اکتوبر کو بینظیر بھٹو کے قافلے پر حملے میں ملوث 2 ملزمان گرفتار سی آئی ڈی کا دعویٰ

ملزمان نے سانحہ کارساز کی منصوبہ بندی منگھو پیر میں کی اور دھماکا خیز مواد فرنٹیئر کالونی سے لائے،ایس پی سی آئی ڈی

ویب ڈیسک October 31, 2014

ملزمان نے بے نظیر بھٹو پر حملہ کرنے والے دیگر ملزمان کی بھی نشاندہی کی ہے،ایس پی سی آئی ڈی عثمان باجوہ فوٹو: محمد ثاقب/ایکسپریس

سی آئی ڈی پولیس نے 18 اکتوبر کو پیش آنے والے سانحہ کارساز میں ملوث 2 ملزمان کو گرفتار کا دعویٰ کیا ہے۔

ایس پی سی آئی ڈی عثمان باجوہ نے پریس کانفرنس میں بتایا کہ پولیس نے گارڈن میں کارروائی کرکے 18 اکتوبر کو بے نظیر بھٹو کے قافلے پر حملے میں ملوث 2 ملزمان کو گرفتار کیا ہے۔ پولیس کے مطابق ملزمان کا تعلق کالعدم جماعت سے ہے اور انہوں نے سانحہ کارساز سے متعلق اہم انکشافات کیے ہیں جس میں ملزمان نےبتایا کہ سانحہ کارساز کی منصوبہ بندی منگھو پیر میں ہوئی اور دھماکا خیز مواد فرنٹیئر کالونی سے لایا گیا جب کہ ملزمان نے بے نظیر بھٹو پر حملہ کرنے والے دیگر ملزمان کی بھی نشاندہی کی ہے۔

ایس پی سی آئی ڈی نے مزید بتایا کہ پولیس نے ٹارگٹ کلنگ کی مختلف وارداتوں میں ملوث 2 ملزمان کو بھی گرفتار کیا ہے، ملزمان جمشید اورعابد کو نیشنل ہائی وے سے گرفتار کیا گیا جن کےقبضے سے اسلحہ بھی برآمد ہوا ہے۔