سائبر کرائم کے خلاف یورپین سیکورٹی ایجنسی اورایف بی آئی کا مشترکہ آپریشن

ان ڈارک ویب سائٹس پرغیر قانونی ادویات،بچوں کی نازیبا تصاویر کے کاروبار کےعلاوہ شدت پسندوں کےعزائم کی بھی تکمیل ہوتی ہے

ویب ڈیسک November 07, 2014

اس مشترکہ آپریشن کی بدولت جرائم کی مدد کرنےوالے اہم کرمنل انفراسٹریکچر کوتوڑنے میں مدد ملی ہے، سربراہ یوروپول فوٹو:فائل

ISLAMABAD: سائبر کرائم کے خلاف کریک ڈاؤن کرتے ہوئے یورپین سیکورٹی ایجنسی یورو پول اور ایف بی آئی نے امریکا اور یورپ میں سیکڑوں ڈارک ویب سائٹس کو بند کرکے 17 افراد کو گرفتار کر لیا ہے۔

یوروپول اور ایف بی آئی نے امریکا سمیت 16 یورپی ممالک میں مشترکہ آپریشن کیا۔ اس دوران مشہور ڈارک ویب سائٹ 'سلک 2.0 سمیت 400 ویب سائٹس کو بند کردیا گیا جب کہ 17 ویب آپریٹریرز کو بھی گرفتار کر لیا گیا جس میں 6 برطانوی باشندے بھی شامل ہیں، ڈارک ویب سائٹس وہ سائٹس ہیں جن تک روایتی انداز میں رسائی حاصل نہیں کی جاسکتی بلکہ اس کے لیے مخصوص طریقہ کار اختیار کرنا پڑتا ہے اور یہ ویب سائٹس غیرقانونی کاموں اور کاروبار کے لیے استعمال کی جاتی ہیں جب کہ یہ ویب سائٹس ہزاروں غیر قانونی مارکیٹس کے گھربھی تصور کئے جاتے ہیں یہاں غیر قانونی ادویات، بچوں کی نازیبا تصاویر کے کاروبار کے علاوہ شدت پسندوں کے عزائم کی بھی تکمیل ہوتی ہے۔

عالمی سطح پر یہ غیر قانونی ڈارک سائٹس کے خلاف بڑا مشترکہ آپریشن تھا جس کا مقصد ڈارک ویب سائٹس کو روکنا ہے، گزشتہ سال آپریشن میں بڑی امریکی ڈارک ویب سائٹ ڈرگ بازار کو بند کرکے اس کے مالک کو گرفتار کر لیا گیا تھا تاہم اس اقدام کو ناکافی قرار دیا گیا تھا جس کے بعد ہی عالمی سطح پر آپریشن کا منصوبہ بنایا گیا، بند کی گئی بڑی امریکن ویب سائٹ''سلک روڈ 2.0 '' گزشتہ سال لاؤنچ کی گئی تھی جب کہ یہ سائٹ غیر قانونی ادویات کی خریدوفروخت کے لیے بدنام تھی، کریک ڈاؤن کے دوران ویب سائٹ کے مالک کو بھی گرفتار کر لیا گیا ہے۔

یوروپول کے سربراہ ٹرولز اورٹنگ نے بتایا کہ اس مشترکہ آپریشن کی بدولت جرائم کی مدد کرنےوالے اہم کرمنل انفراسٹرکچر کوتوڑنے میں مدد ملی ہے، ان سائٹس کو نہ صرف بند کیا گیا ہے بلکہ ان جگہوں کو بھی نشانہ بنایا گیا ہے جہاں مجرم خود کو بہت محفوظ سمجھتے تھے۔