کوئٹہ کے ڈبل روڈ پردھماکے میں 2 افراد جاں بحق 28 زخمی

دھماکا ریمورٹ کنٹرول تھا جبکہ 40 کلو دھماکا خیز مواد ہوٹل کے قریب کھڑی گاڑی میں نصب کیا گیا تھا، بی ڈی ایس

ویب ڈیسک November 11, 2014

بم دھماکے کے بعد سیکیورٹی فورسز نے علاقے کو محاصرے میں لے لیا۔ فوٹو: اے ایف پی

کوئٹہ کے علاقے ڈبل روڈ پر زور دار بم دھماکے کے نتیجے میں 2 افراد جاں بحق جبکہ 4 پولیس اہلکاروں سمیت 28 زخمی ہوگئے۔

ایکسپریس نیوز کے مطابق ڈبل روڈ پر شہری ہوٹل پر ناشتہ کررہے تھے کہ اس دوران قریب کھڑی گاڑی میں نصب دھماکا خیز مواد زور دار دھماکے سے پھٹ گیا جس کے نتیجے میں متعدد افراد زخمی ہوگئے جنہیں فوری طور پر امدادی ٹیموں نے جائے وقوعہ پر پہنچ کر قریبی اسپتال منتقل کیا جہاں دوران علاج ایک بچہ دم توڑ گیا۔ پولیس کے مطابق دھماکا خیز مواد ایک گاڑی میں نصب تھا جس کے پھٹنے سے متعدد دکانیں تباہ اور 7 گاڑیوں کو نقصان پہنچا جبکہ جائے وقوعہ سے انسداد دہشتگردی عدالت کے جج نذیراحمد لانگو کی گاڑی بھی گزررہی تھی جو دھماکے کی زد میں آگئی.

بم ڈسپوزل اسکواڈ کے مطابق دھماکے میں تقریباً 40 کلو دھماکا خیزمواد استعمال کیا گیا اورخدشہ ہے کہ دہشتگردوں کا ہدف انسداد دہشتگردی کی عدالت کے جج تھے۔ ایس ایس پی آپریشنز کا کہنا ہے کہ جس گاڑی میں دھماکا خیز مواد رکھا گیا اس کا انجن اور چیسز نمبر حاصل کرلیا جب کہ دھماکے میں ایک بچہ جاں بحق ہوا جو اس وقت گاڑی کے قریب موجود تھا جب کہ اسپتال میں زیر علاج ایک زخمی بھی دم توڑ گیا جس کے بعد دھماکے میں ہلاکتوں کی تعداد 2 ہوگئی۔

دوسری جانب وزیراعلی بلوچستان ڈاکٹرعبدالمالک بلوچ نے آئی جی کو شہر بھر میں حفاظتی انتظامات مزید سخت کرنے اور دھماکے میں ملوث عناصر کو گرفتار کرنے کی ہدایت جاری کرتے ہوئے ڈبل روڈ دھماکے کی رپورٹ طلب کرلی۔