ایکسپریس انٹرٹینمنٹ کے مارننگ شو’’ست رنگی‘‘ کی زبردست پذیرائی

کلچرل رپورٹر  بدھ 19 نومبر 2014
کراچی: اداکار عمران عباس مارننگ شو ’’ست رنگی‘‘ کی میزبان جویریہ سعود کے ساتھ کھڑے ہیں۔ فوٹو: ایکسپریس

کراچی: اداکار عمران عباس مارننگ شو ’’ست رنگی‘‘ کی میزبان جویریہ سعود کے ساتھ کھڑے ہیں۔ فوٹو: ایکسپریس

کراچی: ایکسپریس انٹرٹینمنٹ کی جانب سے گزشتہ روزشروع ہونیوالے مارننگ شو’’ست رنگی‘‘ نے ناظرین کواپنے حصار میں جکڑ لیا،پہلے ہی دن شو میں موجود نامور شخصیات نے اپنی بہترین گفتگو سے شوکو چار چاند لگادیے۔

گزشتہ روز پیش کیے جانیوالے شو کا موضوع ’’ماں، بچہ اورماں کی نیند‘‘تھا جس میں  ایکسپرٹ انیلاویلڈن نے بچے اورماں کے حوالے سے دلچسپ باتیں بتائیں اور لوگوں کے سوالات کے جواب دیے۔اس پروگرام میں مشہور اداکار عمران عباس نے بطور مہمان شرکت کی۔بھارت کے معروف ہدایت کار وکرم بھٹ نے فلم میں ان کے ساتھ کیے ہوئے کام کے بارے میں بہت سی دلچسپ باتیں کیں جبکہ وکرم بھٹ نے اپنی فلم کریچر3Dکی یادیں تازیں کیں،اس فلم میں ہونے والے واقعات سے لوگوں کو محظوظ کیا۔

اس موقع پر’’ست رنگی‘‘ کی میزبان اور معروف ادکارہ کمپیئر جویریہ سعودنے ان کی فلم کاگیت ’’محبت برسا نہ دیں کہ ساون آیا‘‘بہت خوبصورت اندازمیں پیش کیا، جس میں عمران عباس نے ان کا بھر پور ساتھ دیا، شو میں اداکار عمران عباس نے اپنے پرستاروں کے فیس بک پرآنے والے پیغامات پڑھ کر سنائے۔

ایکسپریس انٹرٹینمنٹ سے پیش کیا جانے والا مارننگ شو’’ست رنگی‘‘ پیر سے جمعہ تک پیش کیا جائے گا، یہ شو صبح 9 بجے شروع ہوکر 11 تک جاری رہے گا،’’ست رنگی ‘‘ کے آج پیش کیے جانے والے شومیں فٹنس اوریوگا ایکسپرٹ شکیلہ حسن یوگا اور فٹنس کے حوالے سے قیمتی مشورے دیں گی جبکہ نامور اداکارجاویدشیخ اس شو میں خصوصی طور پر شرکت کریں گے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔