ودیا بالن نئی فلم ’’ہماری ادھوری کہانی‘‘ میں گل فروش بنیں گی

شوبز ڈیسک  پير 24 نومبر 2014
فلم ’’ہماری ادھوری کہانی ‘‘ میں ودیا بالن کے ساتھ مرکزی کردار میں عمران ہاشمی کاسٹ ہیں۔ فوٹو: فائل

فلم ’’ہماری ادھوری کہانی ‘‘ میں ودیا بالن کے ساتھ مرکزی کردار میں عمران ہاشمی کاسٹ ہیں۔ فوٹو: فائل

ممبئی: بالی ووڈ کی اداکارہ ودیا بالن اپنی اگلی فلم ’’ہماری ادھوری کہانی ‘‘ میں ایک گُل فروش خاتون کا کردار ادا کریں گی۔

اس نئی رومینٹک اور ڈارمہ فلم کو مشہور ہدایتکار موہت سوری ڈائریکٹ کر رہے ہیں جب کہ اس فلم کے پروڈیوسر اور مصنف مہیش بھٹ ہیں۔ فلم ’’ہماری ادھوری کہانی ‘‘ میں ودیا بالن کے ساتھ مرکزی کردار میں عمران ہاشمی کاسٹ ہیں جب کہ راج کمار رائو بھی اہم کر دار میں جلوہ گر ہو رہے ہیں۔ اس فلم کی خاص بات یہ ہے کہ یہ فلمساز مہیش بھٹ کے والدین کی لو اسٹوری پر مبنی ہے۔ مہیش بھٹ کے والد ماضی کے گجراتی سینما کے مشہور ڈائریکٹر ‘ پروڈیوسر نانا بھائی بھٹ اور ان کی دوسری بیوی ہندی فلموں کی سابق اداکارہ شیریں محمد علی کے مابین پروان چڑھنے والی محبت کی کہانی اس نئی فلم میں دکھائی جائے گی۔

فلمساز مہیش بھٹ ہی شیریں محمد علی کی اکلوتی اولاد ہیں جب کہ ان کے دوسرے دونوں بھائی مکیش بھٹ اور روبن بھٹ نانا بھائی بھٹ کی پہلی بیوی میں سے ہیں۔ یہ فلم آئندہ برس جون میں ریلیز کی جائے گی۔ ودیا بالن سے متعلق اس بات کا پتہ چلا ہے کہ وہ فلم میں ایک پھول بیچنے والی کا کردار ادا کر رہی ہیں جو کہ اپنی فلاور پاور سے اس فلم میں بھی شاندار پرفارمنس دینے کی امید رکھتی ہیں۔ ودیا بالن ان دنوں جنوبی افریقہ اور دبئی میں شوٹنگ میں مصروف ہیں۔

قبل ازیں ودیا بالن 2011ء میں بھی عمران ہاشمی کے ساتھ ہٹ فلم ’’ڈرٹی پکچرز ‘‘ میں کام کر چکی ہیں‘ اس فلم میں ان کی شاندار اداکاری پر ودیا بالن کو نیشنل فلم ایوارڈ اور فلم فیئر ایوارڈ فار بیسٹ ایکٹریس بھی مل چکا ہے‘ اسی طرح اب فلمی حلقے کے لوگ یہ امید کر رہے ہیں کہ ودیا بالن اپنی اس نئی فلم میں اداکار عمران ہاشمی کے ساتھ ایک مرتبہ پھر پہلے کی طرح شاندار پرفارمنس کا مظاہرہ کرنے والی ہیں اور امید ہے کہ ان کے مداح انھیں ایک گُل فروش کے روپ میں بھی پسند کریں گے۔ ودیا بالن کی رواں سال آنے والی فلمیں ’’شادی کے سائیڈ ایفکیٹس ‘‘ اور ’’بوبی جاسوس ‘‘ بھی بہترین فلمیں رہی ہیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔