قائم علی شاہ نے اپنے فیصلوں سے خود کو صوبے کا نہیں پیپلزپارٹی کا وزیراعلیٰ ثابت کیا بابرغوری

سرکاری ملازمتوں میں شہری آبادی کو نظراندازکرنےپرتحفظات ہیں جبکہ خراب طرزحکمرانی صوبائی حکومت کی پہچان بن چکی،بابرغوری

ویب ڈیسک November 24, 2014

صوبائی بیوروکریسی میں اقربا پروری اور کرپشن بری طرح پھیل چکی ہے،بابر غوری کا وزیراعلیٰ سندھ کو خط فوٹو:فائل

ایم کیوایم کے رہنما سینیٹر بابر غوری کی جانب سے وزیراعلیٰ سندھ کو خط لکھا گیا ہے جس میں صوبائی حکومت میں سرکاری ملازمتوں میں شہری آبادی کو نظر انداز کرنے پر شدید تحفظات کا اظہار کیا گیا ہے۔

ایکسپریس نیوز کے مطابق ایم کیوایم کے رہنما سینیٹر بابر غوری کی جانب سے وزیراعلیٰ سندھ سید قائم علی شاہ کو لکھے گئے خط میں کہا گیا ہے کہ آپ کی حکومت میں گزشتہ کئی سال سے قواعد و ضوابط کی خلاف ورزیاں کی گئیں، وزیراعلیٰ نے وفاقی نوکریوں میں آبادی کے لحاظ سے صوبوں کے حق کی بات کی لیکن صوبائی حکومت میں ملازمتیں دیتے وقت شہری آبادی کو نظر انداز کیا گیا ہے۔

سینیٹر بابر غوری کی جانب سے لکھے گئے خط میں مزید کہا گیا ہے کہ صوبائی ملازمتوں میں شہری سندھ کو حصہ نہ دے کر آئین کی خلاف ورزی کی گئی، پولیس ،زراعت، ایکسائز، قانون اور دیگر شعبوں کی ملازمتوں میں شہری سندھ کا حصہ نہیں کیا گیا، اچھا ہوتا کہ اگر آبادی کے لحاظ سے نمائندگی کے اصول پر سندھ میں بھی عمل ہوتا۔ خط میں بابر غوری کا کہنا تھا کہ صوبائی بیوروکریسی میں اقربا پروری اور کرپشن بری طرح پھیل چکی ہے اور بری گورننس سندھ حکومت کی پہچان بن چکی ہے جبکہ وزیراعلیٰ سندھ نے اپنے فیصلوں سے خود کو پورے سندھ کا نہیں بلکہ صرف پیپلزپارٹی کا وزیراعلیٰ ثابت کیا ہے۔