بلغاریہ میں لڑکے کی شادی کی آفر گرل فرینڈ کی جان لے گئی

صوفیا: کہتے ہیں کہ خوشی ، غم اور غصے میں خود کو کنٹرول کرنا ہی اصل طاقت ہے اگر کسی بھی جذبے کا اظہار حد سے بڑھ جائے تو وہ نقصان کا باعث بن جاتا ہے ایسا ہی کچھ ہوا بلغاریہ میں جہاں لڑکی اپنے بوائے فرینڈ کی جانب سے ملنے والی شادی کی پیش کش پر اتنی خوش ہوئی کہ جان سے ہی ہاتھ دھو بیٹھی۔

بلغاریہ میں  ڈی میٹرینا دی میٹروا نامی لڑکی اپنے بوائے فرینڈ کے ساتھ چھٹیاں منانے دلکش اور خوبصورت پہاڑی مقام پہنچی اور وہاں خوب سیر کی اسی دوران میٹروا کے بوائے فرینڈ نے فیصلہ کیا کہ وہ اپنی محبوبہ کو سرپرائزدے گا اور جب دونوں ایک بلند پہاڑ کے کنارے پہنچے تو بوائے فرینڈ نے اسے شادی کی پیش کش کردی یہ سننا تھا کہ میٹروا خوشی سے جھوم اٹھی اور اچھل پڑی لیکن  اس دوران وہ اپنا توازن برقرار نہ رکھ سکی اور پہاڑی سے 65 فٹ نیچے کھائی میں جاگری۔

لڑکی کو  اسپتال منتقل کیا گیا لیکن  وہ زخموں کے تاب نہ لاتے ہوئے زندگی کی بازی ہار گئی اور یوں وہ سارے حسین خواب جو اس نے اپنے خیالوں میں سجائے تھے موت کے بے رحم شکنجوں کے گرفت میں رہ گئے۔