سرینا ولیمز نے چھٹی بار آسٹریلین اوپن کا ٹائٹل اپنے نام کرلیا

میلبورن: امریکا کی ٹاپ سیڈ سرینا ولیمز نے روس کی ماریا شراپووا کو ہرا کر کیریئر کا چھٹا آسٹریلین اوپن اور 19واں گرینڈ سلیم ٹائٹل اپنے نام کرلیا۔

آسٹریلیا کے شہر میلبورن میں تقریباً 2 گھنٹے تک جاری رہنے والے فائنل میچ میں سرینا ولیمز نے طبیعت کی ناسازی کے باوجود اچھے کھیل کا مظاہرہ کیا جب کہ مارا شراپووا کھیل کے دوران اعصابی دباؤ کا شکار نظر آئیں تاہم اعصاب کی اس جنگ میں سرینا ولیمز کامیاب رہیں اور انہوں نے دلچسپ مقابلے کے بعد ماریا شراپووا کو 3-6 اور 6-7 سے ہرا کر مارٹینا ناراٹیلووا اور کرس ایورٹ کا 18 بار سنگلز کا ٹائٹل جیتنے کا ریکارڈ بھی توڑ دیا۔