جنگی قیدیوں اور عادی مجرموں کی طرح عدالت لایا گیا، عامرخان

 کراچی: ایم کیو ایم کے رہنما عامر خان کا کہنا ہے کہ انہیں جنگی قیدیوں اور عادی مجرموں کی طرح عدالت میں پیش کیا گیا۔

رینجرز کی جانب سے ایم کیو ایم کے مرکز نائن زیرو پر چھاپے کے دوران زیر حراست افراد کو عدالت کے روبرو پیش کیا گیا، سماعت کے موقع پر ایم کیو ایم کے رہنماعامر خان نے عدالت سے شکایت کی کہ ان کے خلاف کوئی مقدمہ درج نہیں اور میں سیاسی جماعت کا رہنماہوں، مجھے جنگی قیدیوں اور عادی مجرموں کی طرح ہتھکڑیاں لگاکرعدالت میں پیش کیاگیا جس پر عدالت کا کہنا تھاکہ سابق وزیراعظم ذوالفقار علی بھٹوکومارشل لا دورمیں ہاتھوں میں ہتھکڑیاں ڈال کراس طرح سے پیش کیاگیا کہ ان کے ہاتھ پشت پر بندھے ہوتے تھے آپ کوتو بہت سہولت کے ساتھ لایاگیاہے۔

عدالت کے باہر میڈیا سے گفتگوکرتے ہوئے ایم کیو ایم لیگل ایڈ کمیٹی کے رکن محمد جیونی ایڈووکیٹ نے کہاکہ عامر خان ایک سیاسی رہنما ہیں، ان کوجس طرح سے عدالت میں لایاگیا وہ نامناسب طریقہ ہے۔