صولت مرزا کی پھانسی میں توسیع کے احکام نہیں ملے، اکبر درانی

این این آئی  منگل 24 مارچ 2015
صولت مرزا کے مچھ جیل میں وڈیو انٹرویو کی تحقیقات کیلیے آئی جی جیل کو احکام دے دیے ہیں، اکبر درانی. فوٹو : فائل

صولت مرزا کے مچھ جیل میں وڈیو انٹرویو کی تحقیقات کیلیے آئی جی جیل کو احکام دے دیے ہیں، اکبر درانی. فوٹو : فائل

کوئٹہ: سیکریٹری داخلہ بلوچستان اکبر حسین درانی نے کہا ہے کہ صولت مرزا کی پھانسی کی تاریخ میں مزید توسیع کے حوالے سے کوئی احکام ابھی تک موصول نہیں ہوئے، نئے بلیک وارنٹ ملتے ہی اس پر عملدرآمد کیا جائیگا۔

کوئٹہ میں نجی ٹی وی سے گفتگو کرتے ہوئے انھوں نے بتایا کہ صولت مرزا کی پھانسی کی تاریخ میں مزید توسیع، ان کو اڈیالہ جیل منتقل کرنے یا نئی تحقیقاتی ٹیم بنائے جانے کے حوالے سے ابھی تک کوئی احکام نہیں ملے۔ مچھ جیل حکام نے پھانسی کے نئے بلیک وارنٹ کے اجرا کیلیے انسداد دہشتگردی کراچی کی عدالت کو مراسلہ لکھا ہے جس پر فیصلہ آج یا کل ہوجائیگا ۔ انھوں نے کہا کہ صولت مرزا کے مچھ جیل میں وڈیو انٹرویو کی تحقیقات کیلیے آئی جی جیل کو احکام دے دیے ہیں، ایک دو روز میں تحقیقات کمیٹی اپنا کام شروع کردے گی۔ کوئٹہ میں شہیدکیے گئے3 صحافیوں کے قتل کی تحقیقات کیلئے قائم جوڈیشل کمیشن کی رپورٹ محکمہ داخلہ کو مل گئی ہے ۔مانیٹرنگ ڈیسک کے مطابق محکمہ داخلہ بلوچستان کاکہناہے کہ صولت مرزا مکمل صحت مند ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔