اب آپ رات کے گھپ اندھیرے میں بھی دیکھ پائیں گے

کیلیفورنیا: اگرآپ کو کہا جائے کہ ایسے اندھیرے میں کسی کو تلاش کریں جس میں آپ کو اپنا ہاتھ بھی نظر نہ آئے تو یقیناً آپ اسے ناممکن ہی کہیں گے لیکن امریکی ماہرین نے ایسا آئی ڈراپ تیار کرلیا ہے جسے استعمال کرکے اندھیرے میں بھی دیکھنا ممکن ہوسکے گا۔

امریکی ماہرین چشم کی جانب سے اس ڈراپ کا تجربہ سائنسی ویب سائٹ کے رکن پرکیا گیا جس کے لیے اس شخص کی آنکھوں کو جھپکنے سے بچانے کے لیے لگایا گیا اور جراثیم سے بچانے کے لیے ایک خاص سلوشن ڈالا گیا اس کے بعد ان کی آنکھوں میں 3 مرتبہ سیاہ سی ای سکس (Black Chlorine e6) کی 50 مائیکرولیٹر مقدار ڈالی گئی۔

ماہرین کی جانب سے دوا ڈالنے کے بعد اس شخص کو 2 گھنٹے تک آنکھیں بند رکھنے کا کہا گیا اور تجربے کے بعد اسے اندھیرے میں 10 میٹر کی دوری تک مختلف نشانات شناخت کرنے کے لیے دکھائے گئے جسے اس نے باآسانی شناخت کرلیا جب کہ اس آئی ڈراپس کے کوئی سائیڈ ایفیکٹس بھی سامنے نہیں آئے۔ماہرین کا کہنا ہے کہ سی ای سکس محلول کو تجرباتی طور پرشب کوری( نائٹ بلائنڈنیس) کے مرض میں مبتلا ایسے افراد پر آزمایا جارہا ہے جو سورج غروب ہوتے ہیں کم نظر آنے کی شکایت کرتے ہیں تاہم وہ اس کے استعمال سے اندھیرے میں بہتر طور پر دیکھ سکتے ہیں۔

واضح رہے کہ اس سے قبل سی ای سکس کو چوہوں اور دیگر جانوروں پر بھی آزمایا گیا تھا اس کے علاوہ 40 سال قبل اسے رگوں میں انجکشن کے ذریعے داخل کرکے کینسر کے علاج میں بھی کچھ کامیابیاں حاصل کی گئی تھیں۔