اپنوں کے ٹھکرائے عمراکمل غیروں کی آنکھ کا تارا

اسپورٹس ڈیسک  منگل 9 جون 2015
عمر کی خدمات کیریبیئن پریمیئر لیگ ٹیم گیانا ایمازون واریئرز نے بھی محفوظ کرلی ہیں۔  فوٹو: اے ایف پی

عمر کی خدمات کیریبیئن پریمیئر لیگ ٹیم گیانا ایمازون واریئرز نے بھی محفوظ کرلی ہیں۔ فوٹو: اے ایف پی

لندن: اپنوں کے ٹھکرائے عمر اکمل غیروں کی آنکھ کا تارا بن گئے،کاؤنٹی ٹی 20 بلاسٹ میں طوفانی اننگز کی گھن گرج کیریبیئن جزائر تک پہنچ گئی، انھیں گیانا ایمازون واریئرز نے سی پی ایل کیلیے اپنی ٹیم میں شامل کرلیا، نوجوان پاکستانی بیٹسمین کہتے ہیں کہ میں اس سائیڈ کو چیمپئن بنوانے کیلیے اپنی تمام تر صلاحیتیں بروئے کار لاؤنگا۔

پاکستان کرکٹ بورڈ نے نوجوان بیٹسمین عمر اکمل پر بدتمیز اور خود غرض کا لیبل لگا کر اپنی نظروں سے زبردستی گرا دیا مگر غیر ان کی صلاحیتوں سے مکمل طور پر استفادہ کررہے ہیں۔ عمر کی خدمات کیریبیئن پریمیئر لیگ ٹیم گیانا ایمازون واریئرز نے بھی محفوظ کرلی ہیں۔ 25 سالہ بیٹسمین اپنی پُرجوش اور جارحانہ بیٹنگ کی وجہ سے پوری دنیا میں مشہور ہیں۔

وہ جولائی کے پہلے ہفتے میں سی پی ایل جوائن کرینگے، فی الوقت عمر اکمل انگلینڈ میں جاری ٹوئنٹی 20 بلاسٹ میں لیسٹر شائر کی نمائندگی کررہے ہیں، یہ انکی کیریبیئن لیگ میں دوسری انٹری ہوگی، اس سے قبل 2013 میں خدمات بارباڈوس ٹرائیڈنٹ نے حاصل کی تھیں مگر وہاں سفر پراسرار بیماری کے سبب مختصر ہوگیا تھا، بعد میں پی سی بی کی جانب سے دعویٰ کیا گیاکہ عمر مرگی کے مرض میں مبتلا ہیں۔

گیانا کو نوجوان بیٹسمین سے کافی توقعات ہیں،ان کا مختصر ترین فارمیٹ میں ریکارڈ کافی بہتر ہے، وہ پاکستان کی جانب سے 58 اننگز میں 1293 رنز بناچکے،ان میں آسٹریلیا کیخلاف گذشتہ برس ورلڈ ٹوئنٹی 20 میں 94 رنز کی ٹاپ اننگز بھی شامل ہے۔ انھوں نے لیسٹرشائر کی جانب سے بھی اپنے پہلے میچ میں 49 بالز پر 76 رنز بنائے، اس سے قبل فیصل آباد میں سپر 8 ٹوئنٹی 20 ٹورنامنٹ میں عمر اکمل 108 کی ایوریج اور 151.04 کے اسٹرائیک ریٹ سے 216 رنز بناکر دوسرے ٹاپ اسکورر رہے تھے۔

انھوں نے کہاکہ میں کیریبیئن لیگ میں گیانا کی نمائندگی کیلیے بے چین ہوں، میلے جیسے ماحول میں وہاں کرکٹ کھیلنے کا کافی لطف آتا ہے، میں اپنی ٹیم کو چیمپئن بنوانے کیلیے تمام تر صلاحیتیں بروئے کار لاؤں گا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔