محمد عامر اپنی سزا کاٹ چکے وہ دوسرے چانس کے مستحق ہیں، وقار یونس

ویب ڈیسک  جمعرات 31 دسمبر 2015
عامر نے اپنی کارکردگی سے لوگوں کے خیالات بدلے ہیں اور سب انہیں دوبارہ کھیلتا ہوا دیکھنا چاہتے ہیں، ہیڈ کوچ، فوٹو: فائل

عامر نے اپنی کارکردگی سے لوگوں کے خیالات بدلے ہیں اور سب انہیں دوبارہ کھیلتا ہوا دیکھنا چاہتے ہیں، ہیڈ کوچ، فوٹو: فائل

قومی کرکٹ ٹیم کے ہیڈ کوچ وقار یونس کا کہنا ہے کہ محمد عامر نے اپنی سزا کاٹ لی ہے اور وہ مسلسل کارکردگی دکھا رہے ہیں لہٰذا اسی بنیاد پر وہ دوسرے چانس کے مستحق ہیں۔

برطانوی نشریاتی ادارے کو دیئے گئے انٹرویو میں سابق مایہ ناز بولر اور قومی کرکٹ ٹیم کے ہیڈ کوچ وقار یونس نے کہا کہ اسپاٹ فکسنگ اسکینڈل یقیناً پورے ملک کے لیے تکلیف دہ تھا اور خاص طور پر میرے لیے کیونکہ اس وقت میں پاکستانی ٹیم کے کوچ کے فرائض انجام دے رہا تھا لیکن عامر نے نہ صرف آئی سی سی کی سزا پوری کر لی ہے بلکہ وہ جیل کی سزا بھی کاٹ چکے ہیں، لہٰذا ہمارا مذہب اور معاشرہ انہیں معاف کرتے ہوئے ایک اور موقع دینے کی اجازت دیتا ہے۔

ہیڈ کوچ نے کہا کہ محمد عامر پابندی ختم ہونے کے بعد سے صحیح راستے پر چل رہے ہیں اور وہ سخت محنت بھی کررہے ہیں جب کہ عامر میں ابھی بہت کرکٹ باقی ہے جس سے وہ ملک کی خدمت کر سکتے ہیں تاہم ابھی یہ توقع کرنا مناسب نہیں کہ وہ آتے ہی 5 سال پہلے جیسی کارکردگی دکھائیں گے۔ انہوں نے کہا کہ میں ذاتی طور پر محمد عامر کی واپسی کے سلسلے میں بہت زیادہ پرجوش ہوں کیوں کہ عامر نے اپنی کارکردگی سے لوگوں کے خیالات بدلے ہیں اور سب انہیں دوبارہ کھیلتا ہوا دیکھنا چاہتے ہیں۔ وقار یونس کا کہنا تھا کہ عمران خان اور وسیم اکرم جیسےعظیم کرکٹر بھی عامر کی حمایت کر رہے ہیں تاہم محمد عامر کو یقینی طور پر واپسی پر شائقین کے تنقیدی رویئے کا سامنا ہو سکتا ہے جس کے لیے انہیں ذہنی طور پر تیار بھی رہنا ہو گا۔

وقار یونس کا کہنا تھا کہ لوگ عامر کے جارحانہ رویے کی بات کرتے ہیں حالانکہ جو کچھ میدان میں نظر آتا ہے حقیقت میں ایسا نہیں کیونکہ بولنگ کرتے وقت فاسٹ بولروں کے جارحانہ انداز کو ان کے مجموعی رویئے کے طور پر دیکھنا درست نہیں، اگر فاسٹ بولر میدان میں جارحانہ انداز اختیار نہیں کرے گا تو وہ مکمل فاسٹ بولر نہیں ہوگا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔