بھارت کی جوہری طاقت میں حد درجہ اضافہ پاکستان کی سلامتی کیلیے خطرہ ہے ناصر جنجوعہ

پاکستان اوربھارت کو تصفیہ طلب مسائل حل کرنا ہوں گے، ناصرجنجوعہ فوٹو: فائل

---

وزیراعظم کے مشیربرائے قومی سلامتی امور لیفٹیننٹ جنرل (ر) ناصر جنجوعہ نے کہا ہے کہ بھارت کی جوہری طاقت میں حد درجہ اضافہ پاکستان کی سلامتی کے لیے خطرہ ہے جب کہ دفاعی و جوہری امور پر پاکستان کے ساتھ امتیازی سلوک ختم کیا جائے۔

اسلام آباد میں عالمی امن کی ترویج، بین الاقوامی تعاون کے محرکات پربین الاقوامی کانفرنس سے خطاب کے دوران وزیر اعظم کے مشیرنے کہا کہ آج دنیا میں کوئی محفوظ نہیں، آج لوگوں کا خون پیا اوراعضاء چبائے جارہے ہیں،انسانیت کو کچلا جا رہا ہے، اس قتل عام میں کون اورکیوں ملوث ہے اس کا کوئی واضح جواب نہیں۔ انہوں نے کہا کہ ریاستوں کو مفاہمت، انسداد دہشتگردی و انتہا پسندی سے آگے بڑھنا ہوگا، ہمیں انگلیاں اٹھانے کے بجائے امن کیلئے کام کرنا اور دنیاکو محفوظ بنانا ہو گا، دنیا کی بڑی طاقتیں مخاصمت کے بجائے مفاہمت کا راستہ اپنائیں، طاقت سے مسائل کا حل ڈھونڈنے والوں کو مذاکرات کی میز پر بیٹھنا ہوگا۔

ناصرجنجوعہ نے کہا کہ کیا پاکستان نے سویت یونین کو کہا تھا کہ افغانستان پر چڑھائی کرو، کیا روس کا گرم پانیوں تک رسائی کے خواب کا خاتمہ پاکستان کے بغیر ممکن تھا، کیا افغان سویت یونین کے خلاف اکیلے لڑ سکتے تھے یا امریکا یہاں آ سکتا تھا۔ عالمی افواج افغانستان کو تنہا چھوڑ کر چلی گئیں، اس جنگ کے نتائج افغان اور پاکستانی عوام آج بھی بھگت رہے ہیں، کیا دنیا نے کبھی پاکستان کی قربانیوں کا ادراک کیا، پاکستانی افواج نے عالمی امن کے لئے گراں قدر خدمات سرانجام دیں، پاکستان تمام تر تباہی اور آزمائشوں کے باوجود امن کا علمبردار ہے۔

لیفٹیننٹ جنرل ریٹائرڈ ناصر جنجوعہ کا مزید کہنا تھا کہ ہم نے دنیا کو بتا دیا امن برقرار رکھنے کے لئے ہر حد تک جائیں گے، پاکستان اور بھارت کو تصفیہ طلب مسائل حل کرنا ہوں گے،چین کے خلاف منفی سوچ نے بھارت کو مغرب کی محبت کا حقدار ٹھہرایا، بھارت کی جوہری طاقت میں حد درجہ اضافہ پاکستان کی سلامتی کے لیے خطرہ ہے، دفاعی و جوہری امور پر پاکستان کے ساتھ امتیازی سلوک ختم کیا جائے۔