اسمبلی کی مدت ختم ہونے کے دو ماہ بعد عام انتخابات کرائے جائیں گے، وفاقی وزیر قانون

اسلام آباد: وفاقی وزیر قانون فاروق ایچ نائیک کا کہنا ہے کہ اسمبلی کی مدت 16 مارچ کو ختم ہو گی جس کے بعد دو ماہ میں عام انتخابات کرائے جائیں گے۔

چیف الیکشن کمشنر فخرالدین جی ابراہیم سے ملاقات کے بعد میڈیا سے بات چیت کرتے ہوئے ان کا کہنا تھا کہ انتخابات آئین کےمطابق مقررہ وقت پر ہوں گے جب بھی حکومت تاریخ کا اعلان کرے گی الیکشن کمیشن انتخابات کے لئے تیار ہے۔

فاروق ایچ نائیک نے کہا کہ آئین کے مطابق اسمبلی وزیراعظم کی ایڈوائس پر تحلیل ہوگی تاہم پولنگ کی تاریخ دینا صدرآصف علی زرداری کا آئینی حق ہے لیکن ابھی تک انتخابات کی تاریخ کا کوئی تعین نہیں کیا گیا، انہوں نے کہا کہ اگر16 مارچ سے پہلے اسمبلی تحلیل کی جائے تو پھر تین ماہ میں الیکشن کرانا پڑیں گے۔

فاروق ایچ نائیک نے انتخابات وقت پر نہ کرانے کی افواہوں کو غلط قرار دیتے ہوئے کہا کہ ہم چاہتے ہیں قومی اور صوبائی اسمبلیوں کے انتخابات ایک ہی روز ہوں، نگران وزیراعظم کے حوالے سے آئین واضح ہے۔