ایک سال تک ملیریا سے بچانے والی ’’ویکسین‘‘ کے تجربات شروع

نیشنل انسٹی ٹیوٹ آف الرجی اینڈ انفیکشس ڈیزیز کے ماہرین نے PfSPZ ویکسین بنائی ہے جو انسانوں پر آزمائی جارہی ہے۔ فوٹو؛ فائل

---

اس وقت دنیا میں ملیریا کی کوئی ویکسین موجود نہیں لیکن اب امید پیدا ہوئی ہے کہ اب PfSPZ ویکسین کے ذریعے ملیریا کے مرض سے کم ازکم ایک سال تک محفوظ رہا جاسکتا ہے۔

امریکا میں نیشنل انسٹی ٹیوٹ آف الرجی اینڈ انفیکشس ڈیزیز کے ماپرین کے مطابقان کی بنائی ہوئی ویکسین (PfSPZ) ایک سال تک ملیریا کو ٹال سکتی ہے کیونکہ پلازموڈیم فالکیپرم سے محفوظ رکھتی ہے جو ملیریا پھیلانے والا ایک طفیلیہ (پیراسائٹ) ہوتا ہے۔ ماہرین کے مطابق اس کے فیز ون کلینکل ٹرائلز ( طبی آزمائش) شروع ہوچکی ہے جس کی تفصیلات ہفت روزہ مشہور سائنسی جریدے نیچر میں شائع ہوئی ہے۔ ان تجربات سے معلوم ہوا کہ بالغ اور صحت مند افراد کو یہ ویکسین دے کر انہیں ایک سال تک اس موذی اور جان لیوا مرض سے بچایا جاسکتا ہے۔

ماہرین کا کہنا ہےکہ اینوفلس مچھر سے پھیلنے والے ملیریا سے افریقا اور ایشیا کی غریب آبادی سب سے زیادہ متاثر ہوتی ہے اور لاکھوں بچے ہر سال لقمہ اجل بن جاتے ہیں جب کہ عالمی ادارہ صحت کے مطابق ہرسال ملیریا سے 21 کروڑ افراد متاثر اور 4 لاکھ سے زائد افراد ہلاک ہوجاتے ہیں۔

ماہرین کے مطابق ویکسین کی تحقیق میں 18 سے 45 سال تک کے 59 افراد کو شامل کیا گیا جب کہ مزید 32 صحت مند افراد کو بھی شامل کرکے انہیں ویکسین نہیں دی گئی اور انہیں مشاہدے کے لیے رکھا گیا، اس دوران بعض کو 2، 3 اور کچھ کو 4 مرتبہ ویکسین دی گئی اور 3 ہفتے بعد انہیں مچھروں والی جگہ پر رکھا گیا اس طرح جن لوگوں نے 3 ویکسین ملی ان میں 70 فیصد افراد کے خون میں ملیریا کے آثار نہیں دیکھے گئے لیکن جن رضاکاروں کو 4 مرتبہ ویکسین لگائی گئی وہ ملیریا سے مکمل طور پر محفوظ رہے۔

ماہرین کے مطابق تحقیق سے معلوم ہوا کہ پٹھوں کی بجائے رگ میں ویکسین لگانے والے رضاکار ملیریا سے دور رہے اور اس کا بہتر نتیجہ ظاہر ہوا۔ مجموعی طور پر مطالعے میں شامل اور ویکسین لینے والے 55 فیصد افراد ملیریا کے شکار نہیں ہوئے حالانکہ انہیں ملیریا والے مچھروں نے بھی کاٹا تھا۔ سائنسدانوں کے مطابق اس ویکسین کے صحت پر کوئی مضر اثرات بھی نہیں دیکھے گئے۔