سائٹ میں گیس کا دبائوکم، 25 فیصد صنعتوں کی پیداوار بند

کراچی:  چیئرمین سائٹ ایسوسی ایشن آف انڈسٹری محمد عرفان موٹن نے سائٹ کے صنعتی علاقے میں گیس کے کم دبائو پرشدید تشویش کا اظہار کرتے ہوئے کہا ہے کہ گیس کے کم پریشر سے سائٹ کے صنعتی علاقے میں 20سے 25 فیصد صنعتی یونٹس میںپیداواری عمل رک گیا ہے، صنعتکار گزشتہ 2 روز سے گیس کے کم دبائو کی شکایات کررہے ہیں۔

ایک بیان میں انھوں نے کہاکہ صنعتی پیداوار گزشتہ روز ہی سے رک گئی تھیں جب گیس کے دبائو میں اچانک کمی ہوئی تھی اور بہت سے کیپٹو پاور جنریٹنگ یونٹس نے بھی گیس کے کم دبائو اور عدم فراہمی کے باعث ملک کے سب سے بڑے اور قدیم اور صنعتی علاقے میں کام کرنا بند کردیا تھا،

گیس کی کم پریشر پر فراہمی اس صنعتی علاقے کے ساتھ امتیازی سلوک ہے، موجودہ کم دبائو پر گیس کی فراہمی کی وجہ سے صنعتیں اپنے اہداف حاصل کرنے میں ناکام ہو جائیں گی اور برآمدی صنعتوں کی صورتحال تو بہت زیادہ خراب ہوگئی ہے۔ چیئرمین سائٹ ایسوسی ایشن آف انڈسٹری نے مطالبہ کیاکہ ملک کے سب سے بڑے صنعتی علاقے میں گیس کے دبائو کو بہتر بنانے کیلیے جنگی بنیادوں پر ضروری اقدامات کیے جائیں۔