حتمی ٹیم میں شامل کھلاڑیوں کی ابتدائی فہرست تیار

 لاہور:   دورئہ انگلینڈ کیلیے حتمی ٹیم میں شامل کھلاڑیوں کی ابتدائی فہرست تیار کرلی گئی، سلیکٹرز کیمپ کے دوسرے روز بھی کرکٹرز کی کارکردگی کا جائزہ لیتے رہے، میدان میں آنے والے چیئرمین پی سی بی شہریار خان کے ساتھ دورئہ انگلینڈ کیلیے ممکنہ ٹیسٹ اسکواڈ پر مشاورت بھی کی،بورڈ کے سربراہ نے نئے فزیو شین ہیز کو خوش آمدیدکہا۔

تفصیلات کے مطابق قذافی اسٹیڈیم میں جاری اسکلز کیمپ کے دوسرے روز بھی چیف سلیکٹر انضمام الحق دیگر ارکان توصیف احمد، وجاہت اللہ واسطی اور وسیم حیدر کے ہمراہ کرکٹرز کی کارکردگی کا جائزہ لیتے اور دورئہ انگلینڈ کیلیے ممکنہ ٹیسٹ اسکواڈ  پر مشاورت کرتے رہے، انھوں نے ٹریننگ کے آغاز سے شام تک میدان کے وسط اور اطراف میں تیار کی گئی پچز پر سرگرم کھلاڑیوں کی نیٹ پریکٹس دیکھی، بعد ازاں پویلین اینڈ کی طرف لگائے گئے شامیانے کے سائے میں بیٹھ کر چلچلاتی دھوپ میں سرگرم کھلاڑیوں کو ایکشن میں دیکھتے رہے۔

پیسرز کی کاردگی پر خاص طور پر نظر رکھی گئی، شام کو ساڑھے4بجے کے قریب چیئرمین پی سی بی شہریار خان بورڈ ہیڈ کوارٹرز میں اپنے دفتر سے اٹھ کر میدان میں آگئے اور نصف گھنٹے تک سلیکٹرز سے کھلاڑیوں کے انتخاب پر تبادلہ خیال کرتے رہے، بعد ازاں ٹیم منیجر انتخاب عالم بھی اس گفتگو میں شامل ہوگئے۔

موقع دیکھتے ہوئے شین ہیز کو بھی شامیانے میں بلا لیا گیا، چیئرمین پی سی بی نے ان کو نئی ذمہ داریاں سنبھالنے پر مبارکباد دیتے ہوئے پاکستان میں خوش آمدید کہا۔ ذرائع کے مطابق سلیکٹرز نے کھلاڑیوں کی ابتدائی فہرست تیار کرلی ہے، کیمپ میں فارم اور فٹنس کا جائزہ لینے کے بعد ہیڈ کوچ مکی آرتھر کی مشاورت سے 1،2 تبدیلیوں کے ساتھ حتمی اسکواڈ تشکیل دیدیا جائے گا۔