مشکل ٹور کیلئے ٹیم مینجمنٹ نے کرکٹرز کے حوصلے بلند کردیے

 لاہور:  ٹیم مینجمنٹ نے مشکل ٹورسے قبل کرکٹرز کے حوصلے بلند کردیے، منیجر انتخاب عالم نے ڈسپلن پرلیکچر دینے کیساتھ متوقع کنڈیشنز سے بھی آگاہ کیا، ڈراپ ہونے والے پلیئرز کی ڈھارس بھی بندھائی گئی۔

تفصیلات کے مطابق پاکستان ٹیم کیلیے انگلینڈ کا دورہ ہمیشہ حساس ثابت ہوتا ہے، کرکٹرز کو میدان کے اندر اور باہر محتاط رہنے کی اشد ضرورت ہوتی ہے، قذافی اسٹیڈیم میں تربیتی کیمپ کے اختتامی روز مینجمنٹ نے ٹریننگ سے قبل کھلاڑیوں سے بات چیت میں انھیں ذہنی طور پر تیارکرتے ہوئے بروقت پاکستان نہ پہنچ پانے والے ہیڈ کوچ مکی آرتھر کی کمی پوری کردی، اس موقع پر منیجر انتخاب عالم نے ڈسپلن پر لیکچر دیا،انھوں نے کہا کہ آپ طویل عرصہ تک اپنی فیملیز سے دور رہیں گے، اس دوران ایک خاندان کے طور پر اچھے ماحول میں وقت گزارناہوگا، یہ ایک بڑی سیریز اور اپنی اہلیت ثابت کرنے کا بڑا موقع ہے، کاکول اکیڈمی اور پھرلاہور کی سخت گرمی میں محنت کی ہے، اب صلاحیتوں کے اظہار کا موقع آگیا ہے، مشتاق احمد نے کہا کہ جو کرکٹرز منتخب ہوئے، انھیں ملکی خدمت کے جذبے کیساتھ کارکردگی دکھانی ہے، جن کی جگہ نہ بن سکے۔

ان کو دلبرداشتہ ہونے کی ضرورت نہیں، صلاحیتوں کومزید نکھارنے کا وقت مل گیا جس سے فائدہ اٹھائیں، انھوں نے محمد حفیظ کو اسکواڈ میں واپسی پر خوش آمدید بھی کہا۔ فیلڈنگ کوچ گرانٹ لیوڈن کا کہنا تھا کہ منتخب کرکٹرز کو چیلنجز کیلیے تیاررہنا ہوگا، ڈراپ ہونے والے ون ڈے اور ٹوئنٹی 20 میچز کیلیے بلائے جاسکتے ہیں۔ فزیو شان ہیز نے کہاکہ کیمپ ختم ہونے کے بعد بھی ٹیم کی روانگی میںکافی دن باقی ہونگے، فٹنس پلان پرعملدرآمد اور پریکٹس کا سلسلہ جاری رکھیں۔