پچ خراب کرنے پر اینڈرسن کو بولنگ سے روک دیا گیا

گیند پھینکنے کے بعد تیسری بار وکٹ کے ڈینجر زون میں آئے، اوور فن نے مکمل کیا. فوٹو: فائل

---

پچ خراب کرنے پر جیمز اینڈرسن کو بولنگ سے روک دیا گیا،انگلش پیسر اپنے 30 ویں اوور کی پہلی گیند ہی کر پائے، میچ کے دوسرے روز امپائر سے الجھنے پر معذرت نے فی الحال انضباطی کارروائی سے بچا لیا۔

تفصیلات کے مطابق ایجبسٹن ٹیسٹ کے دوسرے روز انگلش پیسر اینڈرسن نے محمد حفیظ کو پہلے ہی اوور میں آؤٹ کیا، بعد ازاں سمیع اسلم اور اظہر علی ڈٹ گئے، مایوسی کے شکاربولر کی جانب سے پچ کو خراب کیے جانے پر ویسٹ انڈین جوئل ولسن نے محتاط رہنے کی ہدایت دی، جیمز اینڈرسن نے امپائر کے فیصلے پر سوالات اٹھائے اور اوور ختم ہونے پر طیش میں آکر کیپ بھی چھینی، اس کے بعد آسٹریلوی امپائر بروس آکسنفورڈ نے انھیں ایک ہی اوور میں 2 بار وارننگ دی، گیند پھینکنے کے بعد تیسری بار پچ کے ڈینجر زون میں آنے پر انھیں اننگز میں مزید بولنگ سے روکا جب کہ تھرڈ امپائر رچی رچرڈسن کی جانب سے ڈسپلنری کارروائی کا سامنا بھی کرنا پڑ سکتا تھا تاہم انھوں نے معذرت کرلی۔

اپنے بیان میں اینڈرسن نے کہا کہ نصف گھنٹے سے اچھی بولنگ نہیں کر پا رہا تھا، مایوسی کا شکار ہوکر غلط رویہ اختیار کیا، جانتا ہوں کہ میرا انداز قابل قبول نہیں تھا، اس لیے دونوں امپائرز سے معذرت کرلی۔ جیمز اینڈرسن نے کہا کہ ضروری نہیں کہ آپ ہمیشہ تسلسل سے وکٹیں حاصل کریں اور فیلڈرز ہر کیچ تھام لیں، کبھی حریف بیٹسمین بھی اچھا کھیل سکتے ہیں جیسا کہ پاکستانی بیٹنگ لائن نے کیا۔ معذرت کے باوجود میچ کے تیسرے روز بھی ان کا رویہ اچھا نہ تھا، پاکستان کی 8 وکٹیں گرچکی تھیں، پیسر اپنے 30 ویں اوور کی پہلی گیند پھینک کر ڈینجر زون میں آگئے، قواعد کے مطابق امپائر نے انھیں اس اننگز میں مزید بولنگ سے روک دیا، اوور کی باقی 5 گیندیں اسٹیون فن نے کرائیں، جیمز اینڈرسن اب دوسری اننگز میں ہی بولنگ کر سکیں گے۔