بینظیربھٹوکیس، صہباپرویزکے وکیل کوپیشی کیلیے آخری موقع

راولپنڈی: راولپنڈی کی انسداد دہشتگردی کی خصوصی عدالت نے بینظیربھٹو قتل کیس میں سابق صدر پرویز مشرف کے ذرائع آمدن کی تفصیلات جمع کرانے کے لیے صہبا مشرف کے وکیل کی عدم  پیشی پرانھیں آخری موقع دیتے ہوئے درخواست پر سماعت15 دسمبر تک ملتوی کردی۔

ہفتے کو راولپنڈی کی انسداد دہشتگردی کی خصوصی عدالت کے جج چوہدری حبیب الرحمن نے بینظیر بھٹو قتل کیس میں جلد ٹرائل اور سابق صدر پرویز مشرف کے اکائونٹس منجمد کرنے کے خلاف دائردرخواستوں کی سماعت کی۔بینظیربھٹو کیس میں نامزد ملزم اعتزاز شاہ کے وکیل نصیر تنولی ایڈووکیٹ نے  استدعا کی کہ ان کے موکل کے مقدمے کودیگر ملزمان سے الگ کر کے جلد سماعت کی جائے۔

ملزم اعتزاز شاہ کی کم عمر ہے لہذا ٹرائل جوینائل کورٹ میں ہونا چاہیے ۔ سابق صدرپرویز مشرف کے اکاونٹس منجمد کرنے کے خلاف درخواست کی سماعت  کے دوران صہبا مشرف کے وکیل عدالت میں پیش نہ ہو سکے۔وکیل نے صہبا مشرف کے ذرائع آمدن کی تفصیلات عدالت میں پیش کرنا تھیں۔