تازہ ترین

براہ راست غیر ملکی سرمایہ کاری جولائی تا ستمبر38.2 فیصد گرگئی

گزشتہ3ماہ میں براہ راست بیرونی سرمایہ کاری25کروڑ ڈالرتک بھی نہ پہنچ سکی،گزشتہ مالی سال 40.3کروڑ تھی

بزنس رپورٹر منگل 18 اکتوبر 2016

سیکیورٹیزسے انخلارک گیا،نجی انویسٹمنٹ ساڑھے3کروڑڈالرکم،مجموعی غیرملکی سرمایہ کاری 53فیصدگھٹ کر36.8کروڑڈالر تک محدود فوٹو: فائل

کراچی: پاکستان میں رواں مالی سال کی پہلی سہ ماہی کے دوران براہ راست غیرملکی سرمایہ کاری سال بہ سال 15کروڑ 40لاکھ ڈالر کم رہی۔

اسٹیٹ بینک آف پاکستان کے مطابق جولائی سے ستمبر2016 تک 24 کروڑ 93 لاکھ ڈالرکی سرمایہ کاری ہوئی جو گزشتہ مالی سال کی اسی مدت میں 40کروڑ 33لاکھ ڈالر کی ایف ڈی آئی سے 38.2فیصد کم ہے، گزشتہ مالی سال کے مقابلے میں رواں مالی سال براہ راست غیرملکی سرمایہ کاری کی آمد(انفلوز) میں شدید کمی دیکھی جارہی ہے۔

گزشتہ مالی سال کی پہلی سہ ماہی کے دوران براہ راست غیرملکی سرمایہ کاری کے انفلوز کی مالیت 66کروڑ 75لاکھ ڈالر جبکہ آؤٹ فلوز 26 کروڑ 42لاکھ ڈالر تھے تاہم رواں مالی سال کے دوران ایف ڈی آئی کی آمد(انفلوز) کی مالیت 32کروڑ 29لاکھ ڈالر کمی سے 34کروڑ 47لاکھ ڈالر جبکہ انخلا (آؤٹ فلوز) کی مالیت 9کروڑ 53لاکھ ڈالر رہی، ستمبر 2015کے مقابلے میں ستمبر 2016کے دوران ایف ڈی آئی کی مالیت 2 کروڑ 59 لاکھ ڈالر کم رہی، ستمبر 2015 میں 16کروڑ 26لاکھ ڈالر کی براہ راست غیرملکی سرمایہ کاری کی گئی تھی تاہم گزشتہ ماہ ایف ڈی آئی کی مالیت 13 کروڑ 67لاکھ ڈالر رہی۔

اسٹیٹ بینک آف پاکستان کے اعدادوشمار کے مطابق جولائی تا ستمبر 2016کے دوران مجموعی غیرملکی سرمایہ کاری 42کروڑ 51لاکھ ڈالر (53.6فیصد) کمی کے ساتھ 36کروڑ 81لاکھ ڈالر رہی، گزشتہ مالی سال کے اسی عرصے کے دوران مجموعی غیرملکی سرمایہ کاری کی مالیت 79 کروڑ 32لاکھ ڈالر رہی تھی، رواں مالی سال کی پہلی سہ ماہی کے دوران غیرملکی نجی سرمایہ کاری 3کروڑ 45لاکھ ڈالر کمی کے ساتھ27 کروڑ 73لاکھ ڈالر رہی جو جولائی تا ستمبر 2015 میں 31کروڑ 18لاکھ ڈالرتھی، پورٹ فولیو سرمایہ کاری جو گزشتہ مالی سال کی پہلی سہ ماہی میں منفی 9 کروڑ 15لاکھ ڈالر تھی رواں مالی سال مثبت 2کروڑ 80لاکھ ڈالر رہی، غیرملکی پبلک انویسٹمنٹ 48کروڑ 13لاکھ ڈالر کے مقابلے میں 9کروڑ ڈالر تک محدود رہی جو گزشتہ مالی سال کی پہلی سہ ماہی سے 39کروڑ ڈالر کم ہے۔