موقع پر موجود افراد کا ٹرک ڈرائیورامان اﷲ پر تشدد، پولیس کے حوالے کر دیا

کراچی: نارتھ کراچی میں تیز رفتار ٹرک نے موٹر سائیکل سوار باپ بیٹی کو کچل کر ہلاک کر دیا۔

موقع پر موجود افراد نے ڈرائیور کو پکڑ کر تشدد کا نشانہ بنا کر پولیس کے حوالے کر دیا ، تفصیلات کے مطابق نارتھ کراچی کے علاقے دو منٹ چورنگی یو ٹرن کے قریب تیز رفتار ٹرک نے موٹر سائیکل سوار 35 سالہ محمد صدیق اور اس کی کمسن بیٹی 8 سالہ طوبیٰ کو کچل کر ہلاک کر دیا جن کی لاشیں ضابطے کی کارروائی کے لیے عباسی شہید اسپتال لے جائی گئیں۔

موقع پر موجود افراد نے حادثے کے ذمے دار ٹرک ڈرائیور امان اﷲ کو پکڑ کر تشدد کا نشانہ بنانے کے بعد پولیس کے حوالے کر دیا ، ایس ایچ او بلال کالونی محسن علی نے بتایا کہ جاں بحق ہونے والے باپ اور بیٹی مسلم ٹاؤن میں واقع امیر سینٹر فیز ون کے رہائشی ہیں جو کہ کسی کام سے سرجانی ٹاؤن گئے تھے اور واپس آتے ہوئے ٹرک کی زد میں آگئے ، ، پولیس نے ڈرائیور کے خلاف مقدمہ درج کرلیا ہے ، تین ہٹی چوک پر گاڑی کی ٹکر سے موٹر سائیکل سوار 2 افراد 26 سالہ عمیر اور 28 سالہ فہیم زخمی ہوگئے۔