پریمیئر فٹبال:بلوچ ایف سی اور کے آر ایل کا مقابلہ برابر

کراچی: پاکستان پریمیئر فٹبال لیگ میں پی آئی اے نے زرعی ترقیاتی بینک کو2-1 سے شکست دے دی، بلوچ ایف سی اور کے آر ایل کا مقابلہ بغیر کسی گول کے برابر رہا۔

تفصیلات کے مطابق کورنگی اسٹیڈیم کراچی میں پی آئی اے نے زیڈ ٹی بی ایل کیخلاف عمدہ کھیل پیش کیا، اسٹرائیکرز شاکر لاشاری اور محمد اشتیاق نے بالترتیب چھٹے اور 68 ویں منٹ میں گول داغ کر ٹیم کو2-0 کی برتری دلادی، میچ کے آخری لمحات میں زرعی بینک کی جانب سے اسٹرائیکر حکمت اللہ نے گول کرتے ہوئے خسارہ کم کیا،آخری5 منٹ میں شاندار کھیل کے باوجود ناکام سائیڈ گیند کو جال میں نہ پہنچا سکی، میچ میں پی آئی اے کے مڈفیلڈرز ندیم طارق اور عبدالغفار کو یلو کارڈز کا سامنا کرنا پڑا، بہترین سکورر شاکر لاشاری اور بیسٹ کھلاڑی زیڈ ٹی بی ایل کے ڈیفینڈر سید غازی خان قرار پائے۔

بلوچ ایف سی اور خان ریسرچ لیبارٹری کے درمیان نوشکی فٹبال اسٹیڈیم میں ہونے والا میچ بغیر کسی گول کے برابری پر ختم ہوا، بلوچ ایف سی کے مڈ فیلڈر حبیب اللہ کو 56 ویں منٹ میں یلو کارڈ کا سامنا کرنا پڑا، بہترین کھلاڑی بلوچ ایف سی کے گول کیپر شیر زمان قرار پائے۔ ایونٹ میں جمعے کو کراچی پورٹ ٹرسٹ اور پی ایم سی ایتھلیٹ کیو ایف سی فیصل آباد کا مقابلہ کے پی ٹی فٹبال اسٹیڈیم کراچی میں ہوگا، حبیب بینک اور ووہیب ایف سی لاہور کی ٹیمیں پیپلز اسٹیڈیم کراچی میں مقابل ہونگی۔