کولکتہ ون ڈے میں 290 فائٹنگ اسکور ہوگا، شعیب محمد

لاہور: سابق ٹیسٹ کرکٹر شعیب محمد نے کہا کہ لمبی بیٹنگ لائن بھارت کے کام آگئی۔

دھونی نے ٹیل اینڈرزکے ساتھ پرفارم کرتے ہوئے اپنی ٹیم کی پوزیشن بہتر بنائی، پاکستانی بولرز نے آخر میں چندگیندیں بھی خراب کیں، پاکستانی اننگزمیں ناصر جمشید اوریونس خان نے پراعتماد بیٹنگ سے فتح کا راستہ آسان بنایا، ایک دو کیچز کے سوا گرین شرٹس کی فیلڈنگ بھی اچھی رہی، انھوں نے کہا کہ کولکتہ میں کنڈیشنز ذرا مختلف ہونگی، آئوٹ فیلڈ  تیز اورگراؤنڈ بڑا ہے، سنگلز ڈبلز پر انحصار کرنا پڑے گا،290 کے قریب اسکور فائٹنگ ہوگا۔

سرفراز نوازکا کہنا ہے کہ بھارت کے خلاف پہلے ون ڈے میچ میں پاکستان نے ٹاس جیتنے کا بھرپورفائدہ اٹھایا۔فاسٹ بولرز نے ہوا اور وکٹ میں نمی کو دیکھتے ہوئے لیٹ سوئنگ کرکے حریف ٹیم کوخاصا پریشان کیا، لنچ کے بعد کنڈیشنز کافی بہتر ہوگئی تھیں، پاکستانی بولرز بھی تھوڑے دھیمے پڑ گئے، محمد عرفان نے بھی شروع میں اچھی بولنگ کرنے کے بعد چند خراب گیندیں پھینکیں، کارکردگی میں تسلسل لانے کیلیے پیسر کو فٹنس پر مزید توجہ دینا ہوگی۔

سکند بخت نے کہا کہ بولرز ہمیشہ سے ہماری قوت رہے ہیں،ایک جائے تو دوسرا جگہ لینے کیلیے تیار نظر آتا ہے، جنید خان کو موقع ملا تو اس نے بھی اپنا انتخاب درست کر دکھایا، چنئی میں پرفارمنس ان کے آئندہ کیریئر کیلیے سنگ میل ثابت ہوگی، انھوں نے کہا کہ عمر گل ٹوئنٹی20 میچ کے برعکس ردھم میں نظر نہیں آئے لیکن انھیں تھوڑا وقت دینا ہوگا،موقع ملتے ہی ایک بارپھربھرپور فارم میں آجائیں گے، یونس خان نے اپنا تجربہ دکھایا، ناصرجمشید بھی صلاحیت کے مطابق کھیلے۔