قلی کا بیٹا کروڑ پتی بن گیا

بینگلورو: انڈین پریمیر لیگ میں انتہائی غریب گھرانے سے تعلق رکھنے والے کھلاڑی نے بھی جگہ بنالی جسے کنگز الیون پنجاب نے 3 کروڑ میں خریدا ہے۔

انڈین پریمیئرلیگ کے 2017 کے ایڈیشن کے لیے کھلاڑیوں کی بولی لگائی گئی جس میں مختلف ٹیموں نے  بڑے بڑے نام مہنگے داموں  خریدے لیکن مہنگے ترین کھلاڑیوں کی فہرست میں تامل ناڈو کے ریلوے اسٹیشن پر کام کرنے والے قلی کا بیٹا بھی شامل ہے جسے کنگز الیون پنجاب نے 3 کروڑ میں خریدا ہے۔

نوجوان فاسٹ بولر تھنگ راسو نٹ راجن کا تعلق بھارتی ریاست تامل ناڈو کے انتہائی غریب خاندان سے ہے اور ان کے والد ریلوے اسٹیشن پر قلی کا کام کرتے ہیں جنہیں روزانہ 500 روپے اجرت ملتی ہے جب کہ اولاد کا پیٹ بھرنے کے لیے فاسٹ بولر کی والدہ بھی بازار میں گوشت فروخت کرتی ہیں لیکن اب نوجوان فاسٹ بولر کو ان کی صلاحیتوں اور آئی پی ایل نے راتوں رات امیر بنا دیا ہے۔

South Indian spinster T Natarajan will feature in our squad this season. Bought for 3 Cr. Welcome to the Pride boy! pic.twitter.com/VLqGtalBhO

— Kings XI Punjab (@lionsdenkxip) February 20, 2017

تھنگ راسونٹ راجن کی خریداری کے لیے بولی کا آغاز 10 لاکھ سے ہوا تھا لیکن انہیں کنگز الیون پنجاب نے 3 کروڑ میں خریدا جو کہ اس فرنچائز کے سب سے مہنگے ترین کھلاڑی ہیں جب کہ اسی فرنچائز نے انگلینڈ کے کپتان این مورگن کو 2 کروڑ میں خریدا ہے۔