نئے نوکیا 3310 کی معلومات منظرعام پر آگئیں

بارسلونا: نوکیا کے مشہور زمانہ موبائل فون 3310 کو دوبارہ متعارف کرانے کے اعلان کے بعد اب اس حوالے سے مزید معلومات منظرعام پر آگئیں۔

ٹیکنالوجی کی معلومات فراہم کرنے والی چین کی معروف ویب سائٹ “وی ٹیک” کے مطابق نوکیا کے نئے موبائل 3310 میں اینڈراؤنڈ نہیں ہوگا البتہ وہ مکمل طور پر نئی خصوصیات کا حامل ہوگا  جب کہ موبائل کا ڈیزائن اس کے مشہور زمانہ موبائل کی طرز پر ہی ہوگا تاہم نیا 3310 وزن میں ہلکا اور پتلا ہوگا۔

ممکنہ طور پر نوکیا 3310 سبز، زرد اور پیلے رنگ میں دستیاب ہوگا اور آئندہ ہفتے 27 فروری سے 2 مارچ تک بارسلونا میں ہونے والی موبائل ورلڈ کانگریس میں اس کی نقاب کشائی بھی کئے جانے کا امکان ہے۔ نوکیا کے نئے موبائل کے حوالے سے بتایا جارہا ہے کہ یہ اینڈرائیڈ اور آئی او ایس آپریٹنگ سسٹم کا مقابلہ کرنے کی بھرپور صلاحیت رکھتا ہے۔

نوکیا 3310 کی قیمت کے حوالے سے مختلف قیاس آرائیاں کی جارہی ہیں تاہم غالب امکان ظاہر کیا جارہا ہے کہ اس کی قیمت تقریباً 49 پاؤنڈ ہوگی جو پاکستانی روپوں میں تقریباً ساڑھے 6 ہزار روپے بنتی ہے۔

واضح رہے کہ نوکیا نے سال 2000 میں ہینڈ سیٹ 3310 متعارف کرایا تھا جس نے دنیا بھر میں نہ صرف مقبولیت حاصل کی بلکہ  سب سے زیادہ فروخت ہونے والے موبائل فون کا  اعزاز بھی حاصل کیا۔