کپل اورسنیل کے درمیان صلح کے لیے سدھو سرگرم

ممبئی: سابق بھارتی کرکٹر اور کامیڈین نوجوت سنگھ سدھو کپل شرما اور سنیل گروور میں صلح کرانے کے لیے سرگرم ہوگئے۔

کامیڈین کپل شرما اور ساتھی اداکار سنیل گروور کے درمیان تنازعے نے معروف کامیڈی شو’’دی کپل شرما شو‘‘ کو اختتام تک پہنچا دیا ہے جب کہ  کپل شرما  کے ناروا سلوک پر احتجاجاً شو کے اداکار علی اصغر، چندن پر بھارکر اور تخلیقی ہدایتکارہ پریتی سیموئس نے بھی علیحدگی اختیار کرلی ہے اور کسی بھی  بالی ووڈ شخصیت کے پروگرام میں شرکت سے انکار کے بعد  تاریخ میں پہلی بار کپل  کو شو کی شوٹنگ کینسل کرنا پڑی لیکن اب اس ساری صورتحال سے پریشان اہم شخصیت تنازعہ ختم کرانے میدان میں آگئی ہے۔

اس خبر کو بھی پڑھیں:سنیل سے جھگڑے کے بعد کپل شرما کا شو مشکلات کا شکار

بھارتی میڈیا رپورٹس کے مطابق نوجوت سنگھ سدھو شو’’دی کپل شرما شو‘‘ کا اہم حصہ ہیں اور اب انہوں نے کپل شرما اور سنیل گروورکے درمیان صلح کرانے کے لیے بھی کوششیں شروع کردی ہیں جب کہ سدھو نے دونوں اداکاروں میں تنازعہ ختم کرنے کے لیے بات چیت بھی شروع کردی ہے جس کی خود سدھو نے بھی تصدیق کردی ہے۔

دوسری جانب نوجوت سنگھ سدھوکا کہنا تھا کہ کپل اورسدھو دونوں میرے بھائی ہیں اور ٹیم کا سینئر ممبر ہونے کے ناطے میرا فرض بنتا ہے کہ دونوں میں اختلافات کا خاتمہ کراؤں اور انہیں ایک ساتھ لاؤں۔

اس خبر کو بھی پڑھیں:کپل شرما کا سنیل گروورکو جوتے سے مارنے کا انکشاف

واضح رہے کہ گزشتہ دنوں آسٹریلیا سے واپسی پر دوران پرواز کپل شرما نے ساتھی اداکار سنیل گروور کو جوتے سے مارا تھا اور مغلظات بکیں تھیں۔