تازہ ترین

واٹس ایپ کے7 اہم نئے فیچرزمتعارف

نئے فیچرز کی مدد سے آپ پیغامات اور گفتگو کو موثر اور دل نشیں بنا سکتے ہیں

ویب ڈیسک اتوار 9 جولائی 2017

ہر گزرتے دن کے ساتھ واٹس ایپ کے صارفین کی تعداد میں مسلسل اضافہ ہورہا ہے،فوٹو:فائل

انٹرنیٹ صارفین کی زندگی میں واٹس ایپ لازم و ملزم حصہ بن گیا ہے اور یہ سوشل میڈیا ایپلی کیشن اتنی موثر اور مفید ثابت ہوئی ہے کہ ہر گزرتے دن کے ساتھ اس کے صارفین کی تعداد میں مسلسل اضافہ ہورہا ہے اوراب واٹس ایپ نے 7 نئے فیچرز متعارف کرائے ہیں جو آپ کے لیے کافی مفید ثابت ہوسکتے ہیں۔

1) جیفس بنانا اور ویڈیو ایڈیٹنگ:

ان دنوں انٹرنیٹ پر پیغام رسانی کے لیے جفس کا استعمال زیادہ سے زیادہ ہوتا جارہا ہے۔ اسی لیے واٹس ایپ نے نیا فیچر متعارف کرایا ہے جس کی مدد سے آپ ویڈیو میں ایڈیٹنگ کرکے انہیں جفس میں تبدیل کرسکتے ہیں۔ اس کے لیے ویڈیو آپ کے موبائل میں محفوظ ہونا ضروری ہےجب آپ کسی ویڈیو کو سینڈ کرتے ہیں تو ایڈیٹنگ کے آپشن بھی سامنے آجاتے ہیں، اگر آپ ویڈیو کی لمبائی یا دورانیہ 6 سیکنڈ کا کردیں گے تو خودبخود جفس کا آپشن آپ کے سامنے آجائے گا جسے استعمال کرکے آپ جفس بنا سکتے ہیں۔ آپ ویڈیو میں کسی بھی جگہ 6 سیکنڈ کے دورانیہ کا جفس بنا سکتے ہیں۔ اس کے علاوہ ویڈیو پر آپ کچھ لکھ بھی سکتے ہیں اور ایموجیز بھی شامل کرسکتے ہیں۔

2) تصاویر میں ایڈیٹنگ

واٹس ایپ نے حال ہی میں انتہائی اہم ایڈیٹنگ کا آپشن بھی متعارف کرایا ہے، جس کی مدد سے آپ اپنی تصاویر کو ارسال کرتے وقت ہاتھ کے ہاتھ انہیں ایڈٹ بھی کرسکتے ہیں۔ اس آپشن کے ذریعے آپ تصاویر پر کچھ تحریر کرسکتے ہیں، کٹ کرسکتے ہیں، چاروں سمت گھماسکتے ہیں اور ان میں ایموجیز شامل کرسکتے ہیں۔ اس کے علاوہ بھی ایڈیٹنگ کے مزید آپشن کو استعمال کرکے پیغام کو موثر بنا سکتے ہیں۔

3) چیٹس کو پن کرنا:

بسا اوقات اس قدر پیغامات آتے ہیں کہ اہم چیٹس کو فورا تلاش کرنا مشکل ہوجاتا ہے۔ واٹس ایپ نے اس مسئلے کو حل کرتے ہوئے چیٹس کو ’’پن‘‘ کرنے کا آپشن متعارف کرایا ہے جس کے نتیجے میں آپ غیر ضروری چیٹس کو نیچے اور اہم چیٹس کو اوپر لاسکتے ہیں۔

4) ٹیکسٹ کا فارمیٹ تبدیل کرنا

اس آپشن کے ذریعے آپ تحریر کو بولڈ (نمایاں) کرسکتے ہیں، فانٹ تبدیل اور چھوٹا بڑا بھی کرسکتے ہیں۔

5) زبان

واٹس ایپ آپ کو مختلف زبانوں میں گفتگو کی سہولت بھی فراہم کرتا ہے۔

6) بات چیت کا شارٹ کٹ

آپ جس شخص یا گروپ میں بہت زیادہ چیٹ کرتے ہیں اس کا ہوم اسکرین پر شارٹ کٹ بھی بنا سکتے ہیں۔ اس طرح آپ کو آسانی ہوگی اور ہر بار واٹس ایپ کھولنے اور پھر چیٹ پر جانے کی زحمت سے بچ جائیں گے۔

7) نوٹی فکیشنز کی کسٹمائزیشن

اس فیچر کے ذریعے آپ اہم افراد کے پیغامات کے نوٹی فکیشنز موصول کرسکتے ہیں۔ اس آپشن کو فعال کرنا آسان ہے۔ کسٹم نوٹی فکیشنز میں جاکر اپنی مرضی کے کنٹیکٹس کے نوٹی فکیشن سبسکرائب کریں۔