جعلی ریاست اسرائیل کی فلسطینی سرزمین پر قیام کے بعد سے ہی یہ کوشش رہی ہے کہ وہ کسی نہ کسی طرح بیت المقدس پر اپنا مکمل کنٹرول حاصل کر لے اور اِس کام کے لئے صیہونیوں نے نہ صرف مسجد اقصیٰ کے نیچے کھدائی کر کے مسجد کو نقصان پہنچانے کی کوشش کی، بلکہ سنہ 1969ء میں جنونی صیہونیوں نے مسجد اقصیٰ کو نذرِ آتش کر کے اپنے مذموم عزائم کو عملی جامہ پہنانے کی کوشش کی لیکن وہ ناکام رہے۔14 جولائی سنہ2017ء کو اسرائیلی افواج کا بیت المقدس پر حملہ اور معصوم فلسطینیوں کو شہید کرنا اور پھر مسجد کو مکمل طور پر بند کر دینا دراصل ایک کے بعد ایک بین الاقوامی قانون کی دھجیاں بکھیرنے کی کُھلی مثالیں ہیں۔

بین الاقوامی قوانین اور اقوامِ متحدہ کے قوانین کی رو سے دنیا کے ہر فرد کو آزادی حاصل ہے کہ وہ اپنی عبادت گاہوں میں آزادی کے ساتھ عبادت کرے اور آمدورفت رکھے لیکن یہ واحد سرزمین فلسطین ہے کہ جہاں اسرائیلی مظالم اور دہشت گردانہ کارروائیوں کے باعث مسلسل 70 برس سے فلسطینیوں کے تمام بنیادی حقوق پامال ہوتے آئے ہیں۔ کیونکہ فلسطین نہ تو فرانس ہے، نہ جرمنی ہے اور نہ ہی اٹلی و لندن اور نہ ہی امریکا و یورپ کا کوئی حصہ ہے بلکہ فلسطین مغربی ایشیاء کا دل ہے۔

فلسطین میں بسنے والے انسان بھی شاید امریکا، برطانیہ اور یورپی ممالک کے انسانوں سے بہت زیادہ مختلف ہیں کیونکہ امریکا، برطانیہ یا کسی یورپی ملک میں کوئی نفسیاتی مریض اپنی دل کی بھڑاس نکالنے کے لئے لوگوں کو جبر و تشدد یا پھر کسی اور طرح سے نقصان پہنچانے کی کارروائی عمل میں لائے تو پوری دنیا میں ایسے واویلا مچایا جاتا ہے کہ قیامت ہی برپا ہوگئی ہواور انسانیت برباد ہوگئی، لیکن فلسطین میں انسانیت کے معیار بدل جاتے ہیں نہ ہی اقوام متحدہ کو انسانیت یاد رہتی ہے اور نہ ہی انسانی حقوق کے نام پر بنائی جانے والی عالمی تنظیموں کو احساس ہوپاتا ہے کہ فلسطین میں بسنے والے بھی انسان ہیں۔ایسا محسوس ہوتا ہے کہ فلسطین میں بسنے والے انسان شاید اسرائیل کے پھول برساتے ٹینکوں کے سامنے زبردستی آ جاتے ہیں یا پھر شاید فلسطینی معصوم بچے بھی اسرائیلی میزائلوں کے سامنے آجاتے ہیں۔

14جولائی کو بھی دنیا نے دیکھا کہ کسطرح مسجد اقصیٰ کے صحن میں تین اسرائیلی فوجی ایک فلسطینی جوان کے جسم میں گولیاں اُتار رہے تھے۔ عالمی برادری کی بے حسی کو جھنجھوڑنے کے لئے میرے پاس جو شائستہ الفاظ ہیں میں نے اِن کا استعمال کیا ہے کہ شاید تیرے دل میں اتر جائے میری بات۔دوسری طرف صورتحال یہ ہے کہ قبلہ اول بیت المقدس مسلسل صیہونی سازشوں کے نشانے پر ہے، آئے روز فلسطین میں معصوموں کا قتل عام ہورہا ہے لیکن دوسری طرف امریکا اور اسرائیل نے دنیا کے تمام مسلمان ممالک کو داعش اور دیگر سیاسی مسائل میں ایسا اُلجھا رکھا ہے کہ مسلمان حکمرانوں کی ترجیحات بدل گئی ہیں۔

یہ یقینی طور پر مسلم دنیا کی بدترین صورتحال ہے کہ امریکی چال بازیوں میں پھنس کر مسلم دنیا کے حکمران اپنے اصل مقاصد اور ترجیحات کو پسِ پشت رکھنا چاہتے ہیں اور اِن کی اِس غفلت اور لاپرواہی کے رویوں کے نتیجہ میں مسجد اقصیٰ کو صیہونیوں کی جانب سے بند کردیا جاتا ہے۔ کشمیر اور بھارت میں ہمارے مسلمان بھائی بہن مذہبی آزادی سے دور ہیں اور انسانی حقوق کی پامالیوں کا شکار ہورہے ہیں۔ مسلم دنیا کے حکمرانوں کو ہوش کے ناخن لینے ہوں گے اور امریکی و اسرائیلی ناپاک عزائم کو سمجھنا ہوگا کہ امریکا اور اسرائیل کا مقصد یہی ہے کہ تمام مسلمان ممالک آپس میں گتھم گتھا ہوجائیں اور مسئلہ فلسطین کو فراموش کردیں اور صیہونیوں کی اِس سازش کو عملی جامہ پہنانے کے لئے بھی بدقسمتی سے مسلم دنیا کے حکمران ہی استعمال ہورہے ہیں۔