زیادہ بجلی بنانے والے ’’کھردرے‘‘ سولر پینل

ویب ڈیسک  جمعـء 4 اگست 2017
کھردری سطح والے سیاہ سلیکان پر مشتمل یہ شمسی پینل زیادہ روشنی جذب کرنے کی خصوصی صلاحیت رکھتے ہیں۔ (فوٹو: فائل)

کھردری سطح والے سیاہ سلیکان پر مشتمل یہ شمسی پینل زیادہ روشنی جذب کرنے کی خصوصی صلاحیت رکھتے ہیں۔ (فوٹو: فائل)

اوساکا: جاپان میں اوساکا یونیورسٹی کے ماہرین نے ایک خاص تکنیک کی مدد سے کھردری سطح والے شمسی پینل (سولر پینل) تیار کرلیے ہیں جن کے بارے میں ان کا کہنا ہے کہ مستقبل میں تجارتی پیمانے پر ان کی تیاری نہ صرف کم خرچ رہے گی بلکہ وہ کارکردگی میں بھی موجودہ شمسی پینلوں کے مقابلے میں کہیں آگے ہوں گے۔

ان شمسی پینلوں کی زیادہ کارکردگی کا مطلب یہ ہے کہ کم رقبے والے پینل سے زیادہ بجلی بنائی جاسکے گی۔ حیرت انگیز طور پر کھردرے سولر پینلوں سے بجلی کی بہتر پیداوار کا اصول بہت سادہ ہے: ہموار سطح سے زیادہ روشنی منعکس ہوتی ہے جبکہ کھردری سطح میں روشنی جذب کرنے کی صلاحیت زیادہ ہوتی ہے۔

کسی بھی سولر پینل کی کارکردگی کا انحصار جہاں اس میں استعمال کیے گئے مادّے پر ہوتا ہے وہیں اس میں روشنی جذب کرنے کی صلاحیت بھی خصوصی اہمیت رکھتی ہے کیونکہ وہ خود پر پڑنے والی روشنی کی جتنی زیادہ مقدار جذب کرے گا، اتنی ہی زیادہ بجلی بنانے کے قابل بھی ہوگا۔ اسی لیے شمسی سیل کو زیادہ روشنی جذب کرنے کے قابل بنانے کےلیے انہیں اضافی انتظامات کی (عموماً ایک خاص کوٹنگ کی شکل میں) لازماً ضرورت پڑتی ہے۔

یہی بات مدنظر رکھتے ہوئے اوساکا یونیورسٹی میں ہیراکو کوبایاشی اور ان کے ساتھیوں نے خالص سلیکان سے شمسی سیل کی تیاری کے دوران اس کی اگلی اور پچھلی، دونوں سطحوں پر مائیکرومیٹر جسامت والے چھوٹے چھوٹے ابھاروں کا اضافہ کردیا۔

ماضی میں ماہرین کا یہی ریسرچ گروپ انتہائی سیاہ سلیکان پر مشتمل شمسی سیل تیار کرچکا ہے جو کارکردگی میں موجودہ سولر سیلز سے بہتر ہیں؛ اور انہیں تجارتی پیداوار کے پیمانے تک پہنچانے کی کوششیں جاری ہیں۔

اپنی اسی کامیابی کو آگے بڑھاتے ہوئے کوبایاشی اور ان کی ٹیم نے انتہائی سیاہ شمسی سیل تیار کرتے دوران اس کی سطح پر خردبینی گڑھوں کا اضافہ بھی کردیا، یعنی اسے خاص انداز میں کھردرا کردیا تاکہ وہ اضافی روشنی جذب کرے اور زیادہ مقدار میں بجلی بھی بنا سکے۔

اس تبدیلی کی وجہ سے شمسی سیلوں کی تیاری میں مہنگی اضافی کوٹنگ کی ضرورت ختم ہوگئی ہے یعنی ان کی تیاری بھی خاصی کم خرچ ہوگئی ہے۔ علاوہ ازیں تجربات میں ان شمسی سیلوں نے بہت اچھی کارکردگی کا مظاہرہ کیا۔

کوبایاشی نے امید ظاہر کی ہے کہ بلند کارکردگی والے یہ شمسی پینل مستقبل میں سورج کی روشنی سے بجلی کے حصول کو بہتر بنائیں گے اور اسے دیگر ذرائع توانائی کے مقابلے پر لاسکیں گے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔