ملک میں سی پیک کے منصوبوں کا اجراء نوازشریف کا تاریخی کارنامہ ہے، شہباز شریف

ویب ڈیسک  بدھ 2 اگست 2017
سیاست مخالفین پر کیچڑ اچھالنے کا نہیں خدمت کا نام ہے، شہباز شریف۔  فوٹو : فائل

سیاست مخالفین پر کیچڑ اچھالنے کا نہیں خدمت کا نام ہے، شہباز شریف۔ فوٹو : فائل

 لاہور: وزیراعلیٰ پنجاب شہباز شریف کا کہنا ہے کہ نوازشریف نے ملک کی تقدیر بدل کر رکھ دی ہے جب کہ ملک میں سی پیک کے منصوبوں کا اجراء بھی نوازشریف کا تاریخی کارنامہ ہے۔

وزیراعلیٰ پنجاب شہباز شریف  کا کہنا ہے کہ نوازشریف نے ملک کی تقدیر بدل کر رکھ دی ہے،  نوازشریف نے عزم، محنت اور خدمت کو شعار بناتے ہوئے ملک کو ترقی کی شاہراہ پر گامزن کیا ہے جب کہ ملک میں سی پیک کے منصوبوں کا اجراء بھی نوازشریف کا تاریخی کارنامہ ہے۔ ان کاکہنا تھا کہ  سی پیک کے تحت لگنے والے توانائی منصوبوں کو تیزی سے آگے بڑھایا گیا جب کہ توانائی منصوبوں کی تکمیل سے لوڈشیڈنگ میں خاطرخواہ کمی آئی ہے۔

شہباز شریف نے کہا کہ نوازشریف نے صرف اور صرف خدمت کی سیاست کی ہے، مسلم لیگ (ن) نے ملک میں جمہوری اقدار کو فروغ دیا جب کہ سیاست میں شرافت اور شائستگی مسلم لیگ (ن) کا طرۂ امتیاز ہے۔ انہوں نے کہا کہ نوازشریف نے سیاست میں اصولوں پر کبھی سمجھوتہ نہیں کیا، سیاست مخالفین پر کیچڑ اچھالنے کا نہیں خدمت کا نام ہے اور اس کے لیے مٹی سے مٹی ہونا پڑتا ہے جب کہ نوازشریف کے ترقیاتی ویژن کو مزید آگے لے کر جائیں گے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔