2018 کے انتخابات وقت پرہوں گے جس میں (ن) لیگ فتح حاصل کرے گی، وزیراعظم

ویب ڈیسک  منگل 8 اگست 2017
نوازشریف احتجاج نہیں کررہے وہ تو اپنے گھر جارہے ہیں، شاہد خاقان عباسی- فوٹو: فائل

نوازشریف احتجاج نہیں کررہے وہ تو اپنے گھر جارہے ہیں، شاہد خاقان عباسی- فوٹو: فائل

 اسلام آباد: وزیراعظم شاہد خاقان عباسی کا کہنا ہے کہ 2018 کے انتخابات اپنے وقت پرہوں گے جس میں (ن) لیگ فتح حاصل کرے گی جب کہ وزیراعظم نے دعویٰ کہا کہ نومبر2017 کے بعد ملک میں لوڈشیڈنگ نہیں ہوگی۔

نجی ٹی وی چینل کے پروگرام میں بات کرتے ہوئے وزیراعظم شاہد خاقان عباسی کا کہنا تھا کہ نوازشریف کی نااہلی بہت بڑا دھچکا تھا، جو لوگ نہیں چاہتے کہ پاکستان ترقی کرے وہ سازش کرتے ہیں اور جس معاملے سے ملک کا نقصان ہو اس کو سازش ہی سمجھا جائے گا جب ان سے چوہدری نثار کے کابینہ میں شامل نہ ہونے سے متعلق سوال کیا گیا تو ان کا کہنا تھا کہ اُن کے چوہدری نثارسے بہترین تعلقات ہیں اورانہیں کابینہ کا حصہ ہی سمجھا جائے۔

شاہد خاقان عباسی نے کہا کہ نوازشریف احتجاج نہیں کررہے وہ تو اپنے گھر جارہے ہیں لیکن پارٹی ایم این ایز کی خواہش تھی نوازشریف ان کے حلقوں سے ریلی کی صورت میں گزریں جب کہ جتنا بڑا لیڈر ہوتا ہے اس کو اتنے ہی سیکیورٹی خدشات ہوتے ہیں اور سیکیورٹی خطرات ہرجگہ ہوتے ہیں، اگرسیاست میں رہنا ہے توان حالات سے مقابلہ کرنا ہوتا ہے۔

وزیراعظم کا کہنا تھا کہ آج گالم گلوچ کی سیاست عام ہوچکی ہے، لوگ اسے پسند نہیں کرتے، سیاست کا مقابلہ سیاست سے اور عوامی خدمت سے ہوتا ہے جب کہ سیاسی جماعتوں کےدرمیان میثاق معیشت بھی ہونا چاہیے اور 2018 کے انتخابات اپنے وقت پرہوں گے جس میں (ن) لیگ فتح حاصل کرے گی۔ انہوں نے کہا کہ وزارت عظمیٰ کے لیے میرا نام نوازشریف نے تجویزکیا تھا جس کی سب نے تائید کی جب کہ میں 45 دن کے لیے ہوں یا 10 مہینے کے لیے یہ فیصلہ پارٹی کرے گی۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔