فلم کی ناکامی پر شائقین کا شاہ رخ خان سے پیسوں کی واپسی کا مطالبہ

ممبئی: بالی ووڈ کنگ شاہ رخ خان اور انوشکا شرما کی حال ہی میں ریلیز ہوئی فلم ’’جب ہیری میٹ سیجل‘‘ کی ناکامی کے بعد شائقین نے شاہ رخ خان سے پیسوں کی واپسی کا مطالبہ کردیا۔

ایک وقت تھا جب بالی ووڈ کے بادشاہ شاہ رخ خان کی فلمیں ریلیز ہوتے ہی ریکارڈ بزنس کرتی تھیں لیکن آج کل بالی ووڈ پر حکمرانی کرنے والے خانز کا وقت اچھا نہیں چل رہا جب ہی تو پہلے سلمان خان کی ٹیوب لائٹ باکس آفس پر ناکامی کا شکار ہوئی اور اب شاہ رخ خان کی جب ہیری میٹ سیجل شائقین کو متاثر نہ کرسکی یہاں تک کہ شائقین فلم سے اس قدر مایوس ہوئے ہیں کہ انہوں نےبھارتی وزیر خارجہ سشما سوراج سے مدد کی درخواست کرنے کے ساتھ اپنے پیسوں کی واپسی کا مطالبہ کردیا ہے۔

اس خبرکوبھی پڑھیں: ’’جب ہیری میٹ سیجل‘‘ شائقین کے معیار پر پورا نہ اتر سکی

بھارتی میڈیا کے مطابق فلم دیکھنے کے بعد ٹویٹر پر ایک صارف نے سشما سوراج کو مخاطب کرتے ہوئے لکھا کہ میم میں اس وقت شاہ رخ انوشکا کی فلم جب ہیری میٹ سیجل دیکھ رہا ہوں اور فلم سے اس قدر بیزار ہوگیا ہوں کہ مجھے آپ کی مدد کی ضرورت ہے مہربانی کرکے مجھے بچائیے۔

https://twitter.com/vsurywanshi87/status/893854506047348737

ایک اور صارف نے فلم دیکھنے کے بعد ردعمل ظاہر کرتے ہوئے پیسوں کی واپسی کا مطالبہ کردیا اور کہا کہ فلم دیکھ کر میرا وقت برباد ہوا ہے لہٰذا میرے پیسے واپس کیے جائیں، جب کہ ایک اور صارف نے فلم کے ہدایت کار امتیاز علی کو آڑے ہاتھوں لیتے ہوئے کہا کہ فلم میں ان دونوں کو  ملانےکی کیا ضرورت تھی۔

https://twitter.com/vsurywanshi87/status/893912203874586624

شاہ رخ اور سلمان کی مسلسل فلاپ ہوتی فلموں کے پیش نظر دونوں کا فلمی کیرئیر خطرے میں پڑتا نظر آرہا ہے، جب کہ بالی ووڈ میں رومینٹک ہیرو کے طور پر شہرت حاصل کرنے والے شاہ رخ خان کے بارے میں کہا جارہا ہے کہ اب وہ اس طرح کے کردار کرنے کیلئے موزوں نہیں رہے لہٰذا انہیں سوچ سمجھ کر کردار منتخب کرنے چاہیئں۔

واضح رہے کہ فلم ’’جب ہیری میٹ سیجل‘‘ 5 دنوں میں محض 52 کروڑ 90 لاکھ کا ہی بزنس کرسکی ہے جو رواں سال ریلیز ہونے والی فلموں میں اب تک کا سب سے کم بزنس ہے۔