نوازشریف کا قافلہ جہلم پہنچ گیا

جہلم: سابق وزیر اعظم نواز شریف کا قافلہ راولپنڈی سے جہلم پہنچ گیا جہاں آج رات قیام کے بعد کل لاہور کے لیے روانہ ہوگا۔ 

سابق وزیراعظم نواز شریف کا قافلہ پنجاب ہاؤس راولپنڈی میں قیام کے بعد جی ٹی روڈ سے ہوتا ہوا جہلم پہنچ گیا جہاں آج رات قیام کے بعد کل صبح لاہور کے لیے روانہ ہوگا۔

نوازشریف کے ہمراہ پارٹی رہنماؤں کے علاوہ مسلم لیگ (ن) کے ہزاروں کارکن بھی موجود ہیں۔ کارکنوں نے اپنی گاڑیوں کو بینرز، پینا فلیکس اور شیر کے ماڈلز سے سجا رکھا ہے۔

نواز شریف انتہائی تیز رفتاری سے جی ٹی روڈ پر سفر کرتے ہوئے جہلم پہنچے۔ راستے میں انہوں نے سوہاوہ اور دینہ میں مختصر خطاب کیا۔

نواز شریف کی اسلام آباد سے لاہور روانگی کا سفر گزشتہ روز پنجاب ہاؤس سے شروع ہوا تھا۔ قافلے نے 18 کلو میٹر کا سفر 12 گھنٹے میں طے کیا تھا ۔ نواز شریف نے بدھ اور جمعرات کی درمیانی رات پنجاب ہاؤس راولپنڈی میں قیام کیا اس موقع پر پنجاب ہاوس کے اردگرد سیکورٹی کے انتہائی سخت انتظامات کیے گئے تھے۔

اس خبرکو بھی پڑھیں:  70 سال سے جاری مذاق کو مزید برداشت نہیں کریں گے

ریلی کے باعث جڑواں شہروں میں گزشتہ روز بند کی گئی میڑو بس سروس آج کھول دی گئی ہے ۔ جس کے باعث شہریوں نے سکھ کا سانس لیا اسی طرح مری روڈ پر معمول کی ٹریفک رواں دواں ہے۔ گزشتہ روز کی نسبت آج صبح راولپنڈی میں ریلی کے مقررہ راستے پر ہلکی ٹریفک کھلی رہی تاہم جہلم روڈ سے راشد مہناس روڈ کی جانب جانے والے راستے رکاوٹیں کھڑی کرکے بند رکھے گئے، ائیرپورٹ روڈ سمیت جہلم روڈ سے آنے والی تمام ٹریفک کو مال روڈ کی جانے کی اجازت تھی۔ آج بھی جی ٹی روڈ پر ہیوی ٹریفک تو دکھائی نہیں دے رہی تاہم ہلکی ٹرانسپورٹ اور پبلک ٹرانسپورٹ بھی معمول کے مطابق رواں دواں ہے۔

واضح رہے کہ نواز شریف نے لاہور کیلیے سفر کا آغاز کل پنجاب ہاؤس اسلام آباد سے کیا تھا، وہ براستہ جی ٹی روڈ روات، گوجر خان،جہلم، گجرات اور گوجرانوالہ سے ہوتے ہوئے لاہور پہنچیں گے.