اینڈروئڈ سسٹم کے 8 استعمالات جن سے اکثریت ناواقف ہے

اینڈروئڈ فون کے مختلف ورژنز کے فیچرز میں ریموٹ کنٹرول اور خفیہ گیم بھی شامل ہے۔

ویب ڈیسک اتوار 13 اگست 2017

اینڈروئڈ فون میں کئی اہم آپشن موجود ہیں جو آپ کی زندگی آسان بناسکتے ہیں۔ فوٹو: فائل

لندن: دنیا بھر میں اینڈروئڈ فون تیزی سے مقبول ہو رہے ہیں اور ان کے مختلف ورژنز زیرِ استعمال ہیں جبکہ اسمارٹ فون آپریٹنگ سسٹم کے بہت سے دلچسپ فیچرز ایسے ہیں جن سے ہم خود بھی ناواقف ہیں۔ ان میں سے 8 اہم فیچرز قارئین کی معلومات کے لئے پیش کئے جا رہے ہیں۔

بیٹری کی بچت

اگر آپ اپنے اسکرین کے لیے سیاہ بلیک گراؤنڈ منتخب کرتے ہیں تو ازخود پکسل ہائی لائٹ کا آپشن بند ہو جائے گا اور آپ کی بیٹری دیر تک چلے گی۔ تاہم یہ فیچرتمام اینڈروئڈ فونز میں دستیاب نہیں البتہ سام سنگ اسمارٹ فونز اور ٹیبلٹ کی اکثریت میں یہ فیچر موجود ہے۔

ٹیکسٹ کی آواز میں تبدیلی

ٹیکسٹ ٹو اسپیچ آپشن کے ذریعے آپ اپنے اینڈروئڈ فون پر کوئی بھی مضمون یا کتاب سن سکتے ہیں کیونکہ یہ آپشن ٹیکسٹ کو آواز میں بدل کر سناتا ہے۔ اس کے لیے پہلے سیٹنگز میں جائیں پھر ایسسیبلٹی آپشن پر جا کر ٹیکسٹ ٹو اسپیچ آپشن آن کردیجئے۔

اسمارٹ فون کو دور سے کنٹرول کیجئے

سیٹنگز پر جائیں، وہاں سے سیکیورٹی پر جا کر ڈیوائس مینیجر کے آپشن میں سے اینڈروئڈ ڈیوائس مینیجر کا انتخاب کریں اور پھر ریموٹلی لوکیٹ دِس ڈیوائس سے allow remote lock and erase کے آپشن پر کلک کیجے۔ اب اگر آپ کا فون چوری یا گُم ہو جاتا ہے تو آپ ویب سائٹ کے ذریعے اس کا سارا ڈیٹا مٹا سکتے ہیں اور موبائل فون لاک کر سکتے ہیں۔

اسمارٹ فون کا گیسٹ موڈ

اگر آپ اپنے دوست کو وقتی طور پر استعمال کے لیے اپنا اسمارٹ فون دینا چاہتے ہیں تو اس کے لیے مہمان (گیسٹ) موڈ کا بہترین آپشن استعمال کیا جاسکتا ہے۔ فون کو دو انگلیوں سے سوائپ کیجئے اور یوزر آئکن کو ٹچ کریں جو اوپر سیدھی جانب موجود ہے۔ ایک گیسٹ آئکن سامنے آ جائے گا ۔ اب یہاں آپ ان سہولیات اور آپشن پر کلک کر سکتے ہیں جنہیں دوسرا استعمال کر سکتا ہے۔ دوسری جانب آپ اپنے ڈیٹا کو بھی چھپا سکتے ہیں۔

اسکرین کا محدب عدسہ

اسکرین میگنیفائر کے آپشن سے آپ ٹیکسٹ اور دیگر اشیا کو اپنے اسکرین پر بڑا کر کے دیکھ سکتے ہیں۔

اگر کسی کی نظر کمزور ہے تو اینڈروئڈ کا ایک آپشن اس کا مداوا کر سکتا ہے اور آپ فون کے کسی بھی حصے کو میگنیفائی کر سکتے ہیں۔ اس کے لیے سیٹنگز کے آپشن پر جائیں پھر وہاں سے ایسیسبلٹی تک اور اس کے بعد میگنیفکیشن کا آپشن استعمال کیجئے۔ اس آپشن کے ذریعے آپ اسکرین کے کسی بھی حصے کو تھپتھپا کر زوم کر کے دیکھ سکتے ہیں۔

موبائل کو وائی فائی ہاٹ اسپاٹ میں تبدیل کیجئے

آپ کو مختلف ڈیوائسز چلانے کے لیے قیمتی موڈیم اور راؤٹر خریدنے کی ضرورت نہیں۔ آپ کا اسمارٹ فون ازخود وائی فائی ہاٹ اسپاٹ بن سکتا ہے۔ اس کے لیے سیٹنگز پر جائیں اور ٹیتھرنگ اینڈ پورٹیبل ہاٹ اسپاٹ پر جا کر پورٹیبل WLAN ہاٹ اسپاٹ آپشن چیک کر دیجئے۔

سر کی جنبش سے اسمارٹ فون کنٹرول

اینڈروئڈ فون کو سر کی حرکت سے بھی کنٹرول کیا جاسکتا ہے۔ ایک فری ایپ فیشل eva فیشل ماؤس کے ذریعے اینڈروئڈ آلات کو بڑی آسانی سے سروں کی حرکت سے کنٹرول کیا جا سکتا ہے ۔ اس کی تمام تفصیلات یہاں موجود ہے۔

ایک خفیہ گیم

اینڈروئڈ 2.3 جنجر بریڈ میں ایک چھوٹا گیم چھپا ہے لیکن اسے ڈھونڈ نکالنا بہت مشکل ہوتا ہے۔ سیٹنگز میں جائیں اور اباؤٹ فون اور اباؤٹ ٹیبلٹ کے آپشن میں جائیں۔ اب اینڈروئڈ ورژن پر کئی بار ٹیپ کیجئے۔ اس کے ساتھ ہی ایک چھوٹی مارش میلو (نرم میٹھی سوغات) سامنے آ جائے گی۔ اس پر فوری طور پر ٹیپ کیجئے اور ایک دلچسپ گیم آپ کے سامنے ہو گا۔