نازیہ حسن کو مداحوں سے بچھڑے 17 برس بیت گئے

ویب ڈیسک  اتوار 13 اگست 2017
نازیہ حسن نے اپنے فنی کیریئر کا آغاز15 برس کی عمر میں پاکستان ٹیلی وژن سے کیا،فوٹوفائل

نازیہ حسن نے اپنے فنی کیریئر کا آغاز15 برس کی عمر میں پاکستان ٹیلی وژن سے کیا،فوٹوفائل

لاہور: برصغیر میں پاپ میوزک متعارف کرانے والی نازیہ حسن كو ہم سے بچھڑے 17 برس بیت گئے لیکن وہ آج بھی اپنے مداحوں کے دلوں میں زندہ ہیں۔

3 اپریل 1965 کو کراچی میں میں پیدا ہونے والی پاپ اسٹار نازیہ حسن نے اپنے فنی کیریئرکا آغاز15 برس کی عمرمیں پاکستان ٹیلی وژن سے کیا، نازیہ حسن نے کم عمری میں ہی اپنی فنی صلاحیتوں کا لوہا منوانا شروع کردیا تھا تاہم انہیں عالمی سطح پراس وقت شہرت ملی جب انہوں نے بھارتی پروڈیوسر وہدایت کار فیروز خان کی فلم “قربانی” کا مشہور گیت “آپ جیسا كوئی میری زندگی میں آئے” ریکارڈ کروایا، اس گانے نے نازیہ حسن كو راتوں رات سپراسٹار بنا دیا اور اس طرح وہ پاكستان كے ساتھ بھارتی میوزک انڈسٹری کا بھی جانا پہچانا نام بن گئیں،اس گیت کیلئے انہیں فلم فیئرایوارڈ سے بھی نوازا گیا۔

نازیہ حسن كا پہلا البم “ڈسكو دیوانے تھا جس نے كامیابی كے نئے ریكارڈ قائم كئے، اس البم میں ان كے بھائی زوہیب حسن نے بھی اپنی آواز كا جادو جگایا، بہن بھائی كی اس جوڑی نے بعد میں بھی كئی یادگار گیت گائے۔ “ڈسكو دیوانے” كے بعد اگلے 10 سالوں میں نازیہ كے 4 مزید البم “بوم بوم”،”ینگ ترنگ”، “ہاٹ لائن” اور “كیمرہ كیمرہ” ریلیز ہوئے اور تمام البمزان كی كامیابی اورمقبولیت كے گراف میں اضافہ كرتے چلے گئے۔

نازیہ حسن نے اپنے كیرئیر میں مجموعی طور پر20 سے زائد میوزک ایوارڈ حاصل كئے جن میں بالی ووڈ كا سب سے بڑا فلم فیئر ایوارڈ بھی شامل ہے۔  وہ اپنے منفرد انداز اور ہٹ گیتوں كے باعث نئے سنگرز كے لئے رول ماڈل بن چكی تھیں، كیرئیر كے عروج میں ہی نازیہ حسن كو پھیپھڑوں كا كینسر لاحق ہوگیا جس كے باعث وہ 13 اگست 2000 كو لندن كے  اسپتال میں 35 برس کی عمر میں  انتقال كرگئیں۔

میوزک كی دنیا میں لاتعداد خدمات كے نتیجے میں حكومت پاكستان نے نازیہ حسن كو اعلیٰ ترین سول ایوارڈ “پرائڈ آف پرفارمنس” سے بھی نوازا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔