آئینی اداروں کو حقوق دیے جائیں، تصادم سے بچنا ہوگا، رضا ربانی

خبر ایجنسیاں  منگل 15 اگست 2017
اچھی بات ہے نوازشریف نے مجھے داتا دربار جیسی مقدس جگہ پر یاد کیا، میڈیا سے گفتگو۔ فوٹو : فائل

اچھی بات ہے نوازشریف نے مجھے داتا دربار جیسی مقدس جگہ پر یاد کیا، میڈیا سے گفتگو۔ فوٹو : فائل

 اسلام آباد: چیئرمین سینٹ رضا ربانی نے کہاہے کہ آئین کے تحفظ اور پاسداری کیلیے قوم کو متحد ہونا پڑے گا۔

میڈیا سے گفتگو کے دوران ایک سوال کے جواب میں رضاربانی نے کہا کہ آئین کے تحفظ اور پاسداری کیلیے قوم کو متحد ہونا پڑیگا، پارلیمان عوامی امنگوں کی ترجمان ہے اور جمہوریت کے استحکام میں پارلیمان کا کلیدی کردار ہے، آج تجدید عہد کا دن ہے اور وفاق کو مضبوط بناکر ملک کو عظیم بنانا ہے۔ ہمیں اس عہد کی تجدید بھی کرنا ہوگی کہ آئینی اداروں کو ان کے صحیح حقوق دیے جائیں اور تصادم کا راستہ اختیار کیے بغیر ملک کو ترقی اور خوشحالی پر گامزن کرنا ہوگا۔

چیئرمین سینیٹ کا کہنا تھا کہ ہم تاریخ کے اس موڑ پر کھڑے ہیں جس میں ہمیں اداروں کے مابین تصادم سے بچنا ہوگا اگر آج بھی ہمیں دانشمندانہ فیصلہ نہ کیے تو تاریخ ہمیں کبھی معاف نہیں کریگی۔ اچھی بات ہے کہ سابق وزیراعظم نواز شریف نے مجھے داتا دربار جیسی مقدس اور اچھی جگہ پر یاد کیا ہے۔

قبل ازیں یوم آزادی کے حوالے سے پارلیمنٹ ہاؤس میں پروقار تقریب ہوئی، رضا ربانی اور اسپیکر قومی اسمبلی ایازصادق نے یادگارِ جمہوریت پرپھول چڑھائے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔