گوجرانوالہ میں مالک اورمالکن کا 7 سالہ ملازمہ پر بدترین تشدد

گوجرانوالہ میں مالک اورمالکن نے معمولی سی بات پر 7 سالہ گھریلو ملازمہ کو بدترین تشدد کا نشانہ بنا ڈالا۔ 

امتیاز اور اس کی بیوی نبیلہ نے 7 سالہ گھریلو ملازمہ فضلیت کوکسی بات پر مارنا شروع کیا اور اس دوران معصوم بچی پر تھپڑوں اورمکوں کی بارش کردی گئی، درندہ صفت انسانوں کا اس پر بھی دل نہیں بھرا تو معصوم بچی کو  ڈنڈوں سے اس بری طرح مارا کہ بچی ادھ موا ہوگئی، بچی کو جب اسپتال لایا گیا تو اس کا چہرہ اورجسم ان درندوں کی سنگدلی کی گواہی دے رہا تھا۔

بچی کی حالت  دیکھ کر پولیس کو بلایا گیا جس پر پولیس نے امتیاز اوراس کی بیوی کے خلاف بچی سے  نوکری کرانے اور معمولی زخمی کرنے کی قابل ضمانت  دفعات لگائیں۔

دوسری جانب وزیراعلیٰ پنجاب شہباز شریف نے واقعے کا نوٹس لیتے ہوئے رپورٹ طلب کی تو پولیس نے دونوں میاں بیوی کو گرفتارکرلیا۔