فنون لطیفہ کے شعبوں میں پاکستانیوں کی خدمات کسی سے ڈھکی چھپی نہیں، صنم بخاری

قیصر افتخار  جمعـء 18 اگست 2017
 فنکاروں کو بیرون ممالک کام کے مواقع مل رہے ہیں، انھیں چاہیے وہ لالی ووڈ کی سپورٹ کے لیے بھی خدمات پیش کریں، صنم۔ فوٹو: فائل

 فنکاروں کو بیرون ممالک کام کے مواقع مل رہے ہیں، انھیں چاہیے وہ لالی ووڈ کی سپورٹ کے لیے بھی خدمات پیش کریں، صنم۔ فوٹو: فائل

 لاہور:  اداکارہ وماڈل صنم بخاری نے کہا ہے کہ فنون لطیفہ کے تمام شعبوں میں پاکستانی فنکاروں کی خدمات کسی سے ڈھکی چھپی نہیں ہیں۔

’’ایکسپریس‘‘ سے گفتگو کرتے ہوئے صنم بخاری نے کہا کہ دیکھا جائے تودنیا بھرکے فنکاراپنے ملکوں کے علاوہ دوسرے ممالک میں جاکرکام کرتے ہیں اوران کے اس عمل سے دنیا بھرمیں ان کے ملک کا نام روشن ہوتا ہے۔ اس کی متعدد مثالیں موجود ہیں لیکن پاکستان کے موجودہ دورمیں فنکاروں کوجہاں بیرون ممالک کام کرنے کے بہترین مواقع مل رہے ہیں، وہیں انھیں چاہیے کہ وہ پاکستانی فلم کی سپورٹ کے لیے بھی اپنی خدمات پیش کریں۔

اداکارہ نے کہا کہ ایکٹنگ، میوزک، رقص اوردیگرشعبوں سے وابستہ انٹرنیشنل فیم کے فنکارجب تک اس سلسلے میں آگے قدم نہیں بڑھاتے، تب تک مسائل جوں کے توں رہیں گے۔ یہ بات توسب جانتے ہیں کہ انٹرنیشنل مارکیٹ کا مزاج بالکل الگ ہے اورپاکستانی فلم کا معیاربھی ابھی تک وہ نہیں ہوسکا، جس کی ڈیمانڈ دنیا بھرمیں کی جاتی ہے۔ اس کے لیے ہمارے پاس بہترین چوائس تو وہی فنکار ہیں، جوہالی وڈ اوربالی وڈ سمیت دنیا کے دیگرترقی یافتہ فلم انڈسٹریوں کے ساتھ کام کررہے ہیں، جب یہ لوگ یہاں کام کرینگے تواس کے مثبت نتائج پاکستانی فلم کی ترقی کی صورت میں سامنے آئیں گے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔