سندھ میں حج پر بھیجنے کا جھانسہ دے کر شہریوں کو کروڑوں روپے کا چونا

کراچی: غیر رجسٹرڈ ٹریول ایجنسی نے سیکڑوں شہریوں کو حج پر بھیجنے کا جھانسہ دے کر ڈھائی کروڑ روپے کا چونا لگا دیا۔

کراچی میں قائم غیررجسٹرڈ ٹریول ایجنسی نے معصوم شہریوں کو حج پر بھیجنے کا جھانسہ دے کر ڈھائی کروڑ روپے وصول کرلیے تاہم شہریوں کی شکایت پر ایف آئی اے کے انسداد انسانی اسمگلنگ سرکل نے ایجنسی کو سیل کرکے سب ایجنٹ جہانگیر کو حج پر جانے کے خواہشمندافراد کی رسیدوں  کے ساتھ رنگے ہاتھوں  گرفتار کرلیاہے جب کہ ٹریول ایجنسی کا مالک غلام شبیر اور دیگر ساتھی فرار ہونے میں  کامیاب ہوگئے۔

اس خبرکوبھی پڑھیں: سعودی عرب کا قطری عازمین کو اپنے خرچ پر حج کرانے کا اعلان

ذرائع کے مطابق ایف آئی اے حکام کوچند روز قبل ٹنڈواﷲ یار سے تعلق رکھنے والے ایک شہری کی جانب سے درخواست موصول ہوئی تھی کہ شاہراہ فیصل پر واقع ہاشمی ٹریول ایجنسی کے سب ایجنٹ جہانگیر نے حج پر بھجوانے کے عوض ان سے 4 لاکھ روپے وصول کیے اور اب روزانہ حج پر بھجوانے کی نئی تاریخ دے کر غائب ہوجاتا ہے۔

ایف آئی اے نے درخواست پر کارروائی کرتے ہوئے ہاشمی ٹریول ایجنسی پر چھاپہ مارا تو انکشاف ہوا کہ ٹریول ایجنسی سندھ میں رجسٹرڈ ہی نہیں ہے اورڈیرہ غازی خان سے تعلق رکھنے والا اس کا مالک غلام شبیر غیر قانونی طور پر سب ایجنٹوں  کے ذریعے تقریباً ڈیڑھ سو سے زائد افراد سے ڈھائی کروڑ روپے وصول کرچکا ہےاورایک بھی شخص کو تاحال حج پر روانہ نہیں  کیا گیا ہے جب کہ ہاشمی ٹریول کے نام پر بکنگ کرانے والے افراد در در کی ٹھوکریں  کھانے پر مجبور ہیں۔

اس خبرکوبھی پڑھیں: 71 ہزار پاکستانی عازمین حج سعودی عرب پہنچ گئے

ایف آئی اے نے سب ایجنٹ جہانگیرکو گرفتار کرکے ہاشمی ٹریول دفترسیل کردیا ہے اور ایجنسی کے مالک غلام شبیر سمیت سب ایجنٹوں  فرقان، نعیم اور فواد کی گرفتاری کیلئے چھاپے مارنے کا سلسلہ جاری ہے۔