ہاکی ورلڈ کپ میں پاکستان کی شرکت پر مہر تصدیق ثبت

 کراچی: ہاکی ورلڈکپ میں پاکستان کی شرکت پر مہرتصدیق ثبت ہو گئی، عالمی لیگ میں ناقص کارکردگی کے باجود یورپی چیمپئن شپ کے نتائج نے گرین شرٹس کو آئندہ برس ہونے والے میگا ایونٹ میں جگہ دلا دی۔

سوئٹزر لینڈ کے شہر لوازن میں اپنے ہیڈ کوارٹر سے جاری کردہ اعلامیے میں ایف آئی ایچ نے پاکستان کی عالمی کپ میں شرکت کی نوید سنائی، انٹرنیشنل فیڈریشن کا کہنا ہے کہ عالمی رینکنگ میں 14 ویں پوزیشن پر قناعت کرنے والی پاکستان ہاکی ٹیم نے انگلینڈ میں منعقدہ ایف آئی ایچ ہاکی ورلڈ لیگ میں7 ویں پوزیشن پائی تھی،مگر ان دونوں جاری یورپی ہاکی لیگ کے نتائج نے اگلے برس ہونے والے عالمی کپ میں پاکستان کے کوالیفائی کرنے کے حق پر مہر ثبت کردی۔

واضح رہے کہ عالمی کپ بھارت کے مشرقی شہر بھوبھنیشور میں 28 نومبر سے16 دسمبر تک کھیلا جائے گا، ہالینڈ کے شہر ایمسٹرڈیم میں ان دنوں کھیلی جانے والی یورپی ہاکی لیگ کے سیمی فائنل میں رسائی پانے والی چاروں ٹیموں کا فیصلہ ہونے کے بعد پاکستان کی میگا ایونٹ میں شرکت کی تصدیق ہوگئی۔

آئی ایچ ایف کے قواعد کے تحت یورپی لیگ کے فائنل فور میں جگہ بنانے والے ممالک میزبان ہالینڈ، جرمنی، انگلینڈ اور بیلجیئم کی ٹیمیں پہلے انگلینڈ میں منعقدہ عالمی لیگ مقابلوں کے ذریعے عالمی کپ میں کھیلنے کا حق پانے میں کامیاب ہوگئی تھیں، ان ممالک کے یورپی لیگ سے عالمی کپ میں جگہ بنانے کے بعد عالمی لیگ میں 7 ویںپوزیشن پر فائز پاکستان رینکنگ میں اوپر آگیا اور عالمی کپ میں اس کی شرکت یقینی ہوگئی، عالمی لیگ سے فرانس نے بھی شرکت کا حق پالیا۔

خیال رہے کہ اگلے برس ہونے والے عالمی کپ میں رسائی پانے والا پاکستان 13 واں ملک بن گیا ہے۔ میزبان بھارت، ارجنٹائن، آسٹریلیا، کینیڈا، آئرلینڈ ملائیشیا، اسپین اور نیوزی لینڈ کی ٹیمیں بھی ایکشن میں نظرآئیں گی، عالمی کپ کیلیے دیگر 3 ٹیموں کا فیصلہ اوشیانا، ایشیا اور افریقہ کے کونٹی نینٹل مقابلوں میں ہوگا، 3 مرتبہ عالمی ٹائٹل پر قبضہ جمانے والا آسٹریلیا عالمی کپ میں اپنے اعزاز کا دفاع کرے گا۔

ایف آئی ایچ نے عالمی کپ میں جگہ بنانے پر پاکستان کو مبارکباد پیش کرتے ہوئے اس امر پر خوشی کا اظہار کیاکہ ماضی میں انٹرنیشنل ہاکی میں نمایاں مقام رکھنے والی قومی ہاکی ٹیم کو ایک مرتبہ پھر عالمی افق پر اپنی اہلیت ثابت کرنے کا موقع میسر آئے گا۔

یاد رہے کہ پاکستان4 مرتبہ عالمی کپ اپنے نام کرنے کا منفرد اعزاز رکھتا ہے، قومی ہاکی ٹیم 2014 میں ہالینڈ ہی کے شہر ہیگ میں منعقدہ عالمی کپ کیلیے جگہ بنانے میں ناکام رہی تھی جبکہ وہ2016  کے ریو اولمپکس میں بھی جگہ بنانے میں کامیاب نہ ہوسکی تھی جب کہ یہ امر قابل ذکر ہے کہ پاکستان نے1971میں اسپین کے شہر بارسلونا میں ہونے والے پہلے عالمی کپ کے فاتح ہونے کا اعزاز حاصل کیا تھا۔