سری دیوی کی شکل میں ایک بار پھر ماں مل گئی، سجل علی

کراچی: اداکارہ سجل علی نے سری دیوی کے ساتھ اپنے رشتے کی نوعیت بیان کرتے ہوئے کہا ہے کہ سری دیوی کے ساتھ ان کا رشتہ خونی رشتے سے زیادہ مضبوط ہے۔

خوبصورت آنکھوں اور دلکش چہرے والی نامور پاکستانی اداکارہ سجل علی اپنی پہلی بالی ووڈ فلم ’’مام‘‘ کی شوٹنگ کے دوران کپور فیملی خاص طور پر سری دیوی کے بے حد قریب آگئی تھیں، شوٹنگ کے دوران سجل علی کا رشتہ کپور فیملی سے اتنا مضبوط ہوگیا تھا کہ وہ سری دیوی کی تیسری بیٹی بن گئی تھیں، فلم کی شوٹنگ ختم ہوئے کافی عرصہ بیت چکا ہے لیکن سجل علی ابھی تک سری دیوی کی محبت بھلا نہیں سکی ہیں ،سجل نے صرف کہنے کیلئے سری دیوی کو اپنی ماں نہیں مانا بلکہ ایک اچھی بیٹی ہونے کا ثبوت دیتے ہوئے سری دیوی کیلئے محبت بھرا پیغام دیا ہے۔

اس خبرکوبھی پڑھیں: سجل  اورعدنان کے لیے سری دیوی روپڑیں

اداکارہ سجل علی نے حال ہی میں انسٹا گرام پر سری دیوی کی ایک خوبصورت تصویر شیئر کرتے ہوئے اپنی محبت کااظہار کرتے ہوئے کہا ہے کہ زندگی میں کچھ رشتے ایسے ہوتے ہیں جو خونی رشتوں سے زیادہ اہم ہوجاتے ہیں، میرا اور چاندنی (سری دیوی)کا رشتہ بھی کچھ ایسا ہی ہے، سری دیوی میرے لیے بہت خاص ہیں۔

واضح رہے کہ اس سے قبل بھی سجل علی نے انسٹاگرم پر سری دیوی اور اپنی تصویر شیئر کرتے ہوئےلکھا تھا کہ ماؤں کو ہمیشہ اپنے بچوں کی عادتوں اور موڈ کے بارے میں پتہ رہتا ہے وہ جانتی ہیں کب ان کے بچے اداس اور کب خوش ہیں اور یہ ہی زندگی کی خوبصورتی ہے۔

اس خبرکوبھی پڑھیں: سجل علی کو بالی ووڈ میں پہلا موقع کیسے ملا؟

واضح رہے کہ رواں سال سجل علی کی والدہ راحت آپا کینسر کے باعث انتقال کرگئی تھیں ، والدہ کی موت کے بعد سجل علی کو سری دیوی کی صورت میں ایک بار پھر ماں مل گئی ہے۔