بینظیر قتل کیس میں مشرف کی غیر حاضری کا معاملہ داخل دفتر، جمعرات کو فیصلے کا امکان

اسلام آباد / راولپنڈی: سابق وزیراعظم بے نظیر بھٹو کے قتل کیس میں حتمی بحث کا آخری راؤنڈ آج سے شروع ہوگا۔

بے نظیر بھٹو کے قتل کیس کے اہم ملزم سابق صدر جنرل (ر) پرویزمشرف کا کیس ان کی مسلسل غیرحاضری کے باعث داخل دفترکردیا گیا ہے جبکہ دیگر7ملزمان سابق سی پی او سعودعزیز، ایس پی خرم شہزاد، اعتزاز شاہ، شیر زمان، رفاقت، حسنین،عبدالرشید کے وکلا ملک رفیق، جواد خالد، نصیر تنولی، راؤ رحیم ایڈووکیٹس آج سے حتمی دلائل پیش کریںگے۔ 3 وکلا آج ہی حتمی دلائل مکمل کر لیں گے جبکہ 2 وکلا کل اپنے حتمی دلائل پیش کرینگے جس کے بعد بدھ کے دن سماعت مکمل ہوجائے گی اور فیصلہ محفوظ کرلیا جائے گا جو کہ جمعرات کوسنائے جانے کا قوی امکان ہے۔

واضح رہے کہ استغاثہ نے اپنے حتمی دلائل مکمل کرلیے ہیں، یہ مقدمہ 9 سال 8 ماہ ایک دن سے زیرالتوا ہے۔