آسٹریلیا ویمنز کرکٹ کا عالمی حکمران بن گیا

ممبئی: آسٹریلیا ویمنز کرکٹ کا عالمی حکمران بن گیا، ٹیم نے فائنل میں ویسٹ انڈیز کو104رنز سے مات دے کرچھٹی بار ٹرافی پر قبضہ جمالیا۔

یلو شرٹس کیخلاف سپر سکسز مرحلے میں غیر متوقع فتح حاصل کرنے والی کیریبیئن ٹیم کی خوش فہمی اب دور ہوگئی،فاتح سائیڈ نے جیس کیمرون (75) اور ریشل ہائنز(52) کی بدولت 259کا مجموعہ اسکور بورڈ کی زینت بنایا،3وکٹیں لینے والی ایلیسی پیری نے ٹاپ آرڈر تباہ کرتے ہوئے ناکام سائیڈ کو 145تک محدود رکھنے میں اہم کردار ادا کیا۔ تفصیلات کے مطابق ویسٹ انڈین ٹیم فائنل میںکسی موقع پر بھی خود کو ٹائٹل کی اہل ثابت کرتی نظر نہیں آئی، کینگروز نے ٹاس جیت کر پہلے بیٹنگ کا فیصلہ کیا،اوپنر میگ لیننگ31 رنز بناکر آئوٹ ہوئیں تو 52 رنز کی عمدہ شراکت کا اختتام ہو گیا۔

ریشل ہائنز نے مجموعہ116تک پہنچانے میں52رنز کا حصہ ڈالا، ایلکس بلیک ویل صرف3رنز بنا کر آئوٹ ہوئیں، جیس کیمرون کی 75 رنز پر مشتمل اننگز 181پر تمام ہوئی، لیزا استھیلکر 12 جبکہ سارا کوئٹ اور ایرن اوسبورن 7 ،7رنز تک محدود رہیں، کپتان جوڈی فیلڈز(36) اور ایلیسی پیری(25) کی آٹھویں وکٹ کیلیے ناقابل شکست ففٹی شراکت نے ٹیم کا ٹوٹل259رنز تک پہنچا دیا، شوکونا کوئنٹائن نے3 جبکہ شینل ڈیلے، ٹریمائن سمارٹ ،اسٹیفنی ٹیلر اور انیسہ محمد نے ایک، ایک وکٹ حاصل کی۔

ویسٹ انڈیز کی ٹیم ابتدا میں ہی ایلیسی پیری کے عتاب کا شکار ہوگئی، لوئر آرڈر بیٹنگ میں قابل قدر کارکردگی دکھانے والی پیسر نے بولنگ کا آغاز کرتے ہوئے4اوورز میں اتنے ہی رنز دے کر 3 وکٹیں اڑا دیں،کیسیا نائٹ(17) کی وکٹ32 پر گری، اسٹیفنی ٹیلر 5رنز بناکر آئوٹ ہوئیں،41 کے مجموعی اسکور پر نتاشا میکلین بھی13رنز بناکر چلتی بنیں، کپتان میریسا اگلریا(23) اور دیندرا ڈوٹن (22) کا شکار لیزا استھیلکر نے کرکے اسکور5 وکٹ پر 109 کردیا۔

کیشونا نائٹ نے21 رنز ناٹ آئوٹ بناکر کچھ مزاحمت کی، پوری ٹیم43.1 اوورز میں 145پر ڈھیر ہوگئی، ایلیسی پیری نے اپنے 10اوورز میں 19رنز دے کر 3، لیزا استھیلکر، میگان شیٹ،ایرن اوسبورن نے2، 2 جبکہ جولی ہنٹر نے ایک وکٹ حاصل کی۔ مین آف دی میچ جیس کیمرون کو قرار دیا گیا جبکہ ایونٹ کی بہترین کھلاڑی کا ایوارڈ نیوزی لینڈ کی سوزی بیٹس کو ملا۔