آصف زرداری کے بچوں کے ساتھ بھٹو لگانے کیخلاف درخواست مسترد

بلاول، بختاور اور آصفہ کا تعلق زرداری قبیلے سے ہے اور ان کا نام تبدیل کرنا قوم کیساتھ مذاق ہے، درخواست گزار

ویب ڈیسک منگل 19 ستمبر 2017

بلاول، بختاور اور آصفہ کا تعلق زرداری قبیلے سے ہے اور نام تبدیل کرنا قوم سے مذاق ہے، درخواست گزار۔ فوٹو: فائل

اسلام آباد: ہائی کورٹ نے پیپلز پارٹی کے شریک چیرمین آصف علی زرداری کے بچوں کے نام کے ساتھ بھٹو لگانے کیخلاف درخواست مسترد کردی۔

ایکسپریس نیوز کے مطابق اسلام آباد ہائی کورٹ میں آصف علی زرداری کے بچوں کے نام کے ساتھ بھٹو لگانے کیخلاف درخواست کی سماعت ہوئی۔ جسٹس میاں گل حسن اورنگزیب نے رئیس عبد الواحد کی درخواست مسترد کردی۔

درخواست گزار نے کہا کہ بلاول، بختاور اور آصفہ کا تعلق زرداری قبیلے سے ہے اور ان کا نام تبدیل کرنا پاکستانی قوم کیساتھ مذاق ہے، لہذا عدالت آصف زرداری کے تینوں بچوں کو اپنے نام کیساتھ بھٹو لگانے سے روکے۔ تاہم ہائی کورٹ نے درخواست مسترد کرتے ہوئے کہا کہ نام کی تبدیلی زرداری فیملی کا اپنا نجی معاملہ ہے۔

واضح رہے کہ 27 دسمبر 2007 کو بے نظیر بھٹو کی شہادت کے بعد آصف زرداری پارٹی کے شریک چیرمین بنے تھے جب کہ بلاول ، بختاور اور آصف کے ناموں کے ساتھ بھٹو کا لاحقہ منسلک کردیا گیا تھا۔