چین کے ساتھ پاکستان کا تجارتی خسارہ 12 ارب ڈالر تک جاپہنچا

ویب ڈیسک  بدھ 20 ستمبر 2017
چار سال میں بھارت سے تجارتی خسارہ 5 ارب 94 کروڑ ڈالر رہا، وزیر تجارت پرویز ملک۔ فوٹو: فائل

چار سال میں بھارت سے تجارتی خسارہ 5 ارب 94 کروڑ ڈالر رہا، وزیر تجارت پرویز ملک۔ فوٹو: فائل

 اسلام آباد: چین کے ساتھ پاکستان کا تجارتی خسارہ تین گنا اضافے کے ساتھ 12 ارب ڈالر تک پہنچ گیا۔

قومی اسمبلی کے اجلاس میں وقفہ سوالات کے دوران چین کے ساتھ گزشتہ 5 سال کے تجارتی خسارے کی تفصیلات ایوان میں پیش کی گئیں۔ وفاقی وزیر تجارت محمد پرویز ملک نے تحریری جواب جمع کراتے ہوئے انکشاف کیا کہ 5 سال میں چین کیساتھ تجارتی خسارے میں 3 گنا اضافہ ہوگیا جس کے نتیجے میں خسارہ 12 ارب ڈالر تک پہنچ گیا ہے۔

یہ بھی پڑھیں: چین سے 5.5 ارب ڈالر کی غیر قانونی تجارت، خسارہ بھی 9 ارب ڈالر سے تجاوز

وزیر تجارت پرویز ملک نے بتایا کہ 2016-17 میں چین کے ساتھ تجارتی خسارہ 12 ارب 67 کروڑ ڈالر ہوگیا جو ایک سال پہلے 16-2015 میں 10 ارب 43 کروڑ ڈالر تھا۔ تحریری جواب میں بتایا گیا کہ 15-2014  میں چین کے ساتھ پاکستان کا تجارتی خسارہ 8 ارب ڈالر اور 14-2013  میں 5 ارب 35 کروڑ ڈالر رہا جبکہ 13-2012  میں یہ خسارہ 4 ارب ڈالر تھا۔

وزیر تجارت کے مطابق بھارت کے ساتھ تجارت میں بھی پاکستان مسلسل خسارے میں جارہا ہے۔ چار سال میں بھارت سے 7 ارب 34 کروڑ ڈالر کا سامان منگوایا گیا اور اس کے ساتھ تجارتی خسارہ 5 ارب 94 کروڑ ڈالر رہا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔