عراقی فوج نے کردوں کیخلاف آپریشن شروع کردیا، زبردست جھڑپیں

ویب ڈیسک  پير 16 اکتوبر 2017
لڑائی کے باعث ہزاروں شہریوں کی کرکوک شہر سے نقل مکانی، کرد فورس پیشمرگہ پسپا ہوگئی۔ فوٹو: رائٹرز

لڑائی کے باعث ہزاروں شہریوں کی کرکوک شہر سے نقل مکانی، کرد فورس پیشمرگہ پسپا ہوگئی۔ فوٹو: رائٹرز

کرکوک: عراقی فوج نے آزادی کا ریفرنڈم کرانے پر ریاست کردستان پر چڑھائی کردی ہے اور کرد افواج سے زبردست جھڑپیں ہورہی ہیں۔

غیرملکی خبر ایجنسی کے مطابق عراق سے علیحدگی کا ریفرنڈم کرانے پر عراق نے ریاست کردستان پر قبضہ کے لیے فوجی آپریشن شروع کردیا ہے اور عراقی و کرد افواج کے درمیان شدید جھڑپیں جاری ہیں۔ لڑائی کے باعث ہزاروں شہری کرکوک سے نقل مکانی کرنے پر مجبور ہوگئے ہیں۔

یہ بھی پڑھیں: عراقی کردستان خطے میں نیا خطرہ

عراقی فوج کردستان کے دارالحکومت کرکوک کی جانب پیش قدمی کررہی ہے اور شہر کے جنوب میں فوجی اڈے اور آئل فیلڈ سمیت متعدد اہم تنصیبات پر قبضہ کرلیا ہے۔ کرد میڈیا نے تصدیق کی ہے کہ کردوں کی فورس پیشمرگہ پسپا ہورہی ہیں اور کرکوک میں سیکڑوں مسلح کردوں نے عراقی فوج کا مقابلہ کرنے کے لیے پوزیشنیں سنبھال لی ہیں۔

یہ بھی پڑھیں: پاکستان کردستان کی آزادی کے خلاف

یاد رہے کہ تیل سے مالا مال عراقی ریاست کردستان نے گزشتہ ماہ عراق سے آزادی کے لیے ریفرنڈم کرایا ہے جس میں کرد عوام کی بڑی تعداد نے علیحدگی کے حق میں ووٹ دے دیا ہے۔ اس ریفرنڈم کی پاکستان، ترکی، عراق اور ایران سمیت پوری عالمی برادری نے مخالفت کی ہے۔

واضح رہے کہ شام اور عراق میں داعش کے خلاف جنگ میں عراق اور کرد اتحادی ہیں تاہم عسکریت پسندوں کو شکست کے بعد اب ایک دوسرے سے دست و گریباں ہوگئے ہیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔