ٹینکرزایسوسی ایشن کا پنجاب کیلیے پیٹرول کی فراہمی بند کرنے کا اعلان

کراچی: آئل ٹینکرز ایسوسی ایشن نے سیلز ٹیکس کے خلاف پنجاب میں اتوار سے پیٹرولیم مصنوعات کی ترسیل روکنے کا اعلان کردیا ہے۔

ایکسپریس نیوز کے مطابق  آئل ٹینکرز کنٹریکٹرز ایسوسی ایشن  نے پنجاب کے لیے تیل کی ترسیل روکنے کافیصلہ کرلیا جس کے باعث پنجاب میں پٹرول کی قلت کا خدشہ پیدا ہوگیا۔ رہنما ایسوسی ایشن کے مطابق آج سے تیل بھرنے کی لسٹ میں پنجاب کی گاڑیاں شامل نہیں ہوں گی، جب کہ سیکریٹری جنرل کنٹریکٹرزایسوسی ایشن کا کہنا ہے کہ پنجاب کے لیے آئل ٹینکرز کی روانگی اتوار سے بند ہوجائے گی۔

چیئر مین ٹینکرزایسو سی ایشن یوسف شہوائی کا کہنا ہے کہ پنجاب حکومت نے دیگر صوبوں کی طرح سیلز ٹیکس موخر کرنے کا نوٹی فکیشن جاری نہیں کیا اور نہ ہی ہڑتال میں حصہ لینے کا فیصلہ کیا لہٰذا آئل ٹینکرزایسوسی ایشن کے ایک دھڑے نے پیرسے ہڑتال کرنے کا اعلان کیا ہے۔